សម័្ពន្ធព័ត៌មានកូនខ្មែរ: ច្បាប់

Showing posts with label ច្បាប់. Show all posts

មកដល់ពេលនេះ ការចរចាគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិក្រោមកិច្ចសម្របសម្រួលរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីបង្កើតគណៈកម្មការចម្រុះដោះស្រាយភាពមិនប្រក្រតីជុំវិញការបោះឆ្នោតនោះ នៅមិនទាន់មានអ្វីវិវត្តន៍ទៅមុខនោះទេ។ គណបក្សសង្គ្រោះជាតិ បានបដិសេធក្នុងការចូលរួមដោយបានលើកឡើងថា គណៈកម្មការចម្រុះនេះ មានលក្ខណៈចង្អៀត ព្រោះគ្មានការចូលរួមពីអង្គការសង្គមស៊ីវិល អ្នកអង្កេតការណ៍ជាតិ អន្តរជាតិ និងអង្គការសហប្រជាជាតិជាអាជ្ញាកណ្ដាល។

ជាការបញ្ជាក់តបនឹងការទាមទាររបស់គណបក្សសង្គ្រោះជាតិ នៅថ្ងៃទី៥ ខែសីហា ម្សិលមិញនេះដែរ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានអះអាងប្រាប់ក្រុមអ្នកកាសែតថា ការបង្កើតគណៈកម្មការចម្រុះត្រូវតែអនុលោមតាមយន្តការដែលមានស្រាប់របស់គណៈកម្មធិការជាតិរៀបចំការបោះឆ្នោត (គ.ជ.ប) ហើយថា ប្រសិនបើគណបក្សទាំងពីរ (ប្រជាជន និងសង្គ្រោះជាតិ) ងាកទៅបង្កើតយន្តការថ្មីនោះ វានឹងអាចធ្វើឲ្យជាតិមានភាពច្របូកច្របល់។

អ្នកវិភាគស្ថានការណ៍នយោបាយកម្ពុជាវិញ ភាគច្រើនបានឲ្យតម្លៃទៅលើការជជែកចរចាគ្នារវាងខ្មែរ និងខ្មែរគ្នាឯង ប៉ុន្តែចំពោះការទាមទាររបស់ គណបក្សសង្គ្រោះជាតិដោយសុំឲ្យភាគីអន្តរជាតិពិសេស អង្គការសហប្រជាជាតិក្នុងគណៈកម្មការចម្រុះនោះ ក៏ក្រុមអ្នកវិភាគយល់ថា ពិតជាអាចធ្វើទៅបានប្រសិនបើគ្រប់ភាគីពិតជាចង់ធ្វើ ព្រោះវាមិនអាចបះពាល់ដល់ការអនុវត្តច្បាប់របស់គ.ជ.ប នោះទេ។

លោកមេធាវី សុក សំអឿន បានអះអាងប្រាប់គេហទំព័រថ្មីៗតាមទូរស័ព្ទថា ការទាមទាររបស់គណបក្សសង្គ្រោះជាតិគឺពិតជាអាចធ្វើទៅបាន ព្រោះវាជាយន្តការសម្របសម្រួលមួយ ដែលមិនអាចបះពាល់អ្វីដល់នីតិរដ្ឋនៅកម្ពុជានោះទេ ហើយថា សម្រាប់ប្រទេសកម្ពុជា ការចូលខ្លួនរបស់ក្រុមអង្គការអន្តរជាតិធំៗដើម្បីជួយសម្របសម្រួលផ្នែកបច្ចកទេសនោះ វាជារឿងធម្មតាទៅហើយ។

បើតាមលោកមេធាវី ភាគីអន្តរជាតិដែលចូលរួមក្នុងគណៈកម្មការនោះ មិនចាំបាច់មានសិទ្ធិអំណាចក្នុងការបង្គាប់បញ្ជារអ្វីក៏បានដែរ ដោយគ្រាន់តែផ្ដល់សិទ្ធិឲ្យពួកគេតាមដាន ឃ្លាំមើល និងពិនិត្យការអនុវត្តកិច្ចការរបស់គណៈកម្មការចម្រុះ ដើម្បីឲ្យដឹងថា តើការសិក្សាលើភាពមិនប្រក្រតី និងការដោះស្រាយពបញ្ហាជុំវិញការបោះឆ្នោតនោះ ត្រូវបានគណៈកម្មការចម្រុះអនុវត្តបានកម្រិតណាតែប៉ុណ្ណោះ។

លោក សុក សំអឿន បានបញ្ជាក់បន្ថែមថា៖« ការបង្កើតគណៈកម្មការចម្រុះនាពេលនេះ វាក្លាយជារឿងដ៏លំបាកសម្រាប់គណបក្សសង្គ្រោះជាតិ ព្រោះអ្នកគាំទ្ររបស់គេ បានដាក់សម្ពាធយ៉ាងធ្ងន់ធ្ងរមកលើមេដឹកនាំទាំងពីរ គឺលោក សម រង្ស៊ី និងលោក កឹម សុខា។ អ្នកគាំទ្របក្សសង្គ្រោះជាតិគេ មិនពេញចិត្តឲ្យមេដឹកនាំរបស់គេធ្វើការសម្របសម្រួល ឬបន្ទន់ឯរិយាបទជាមួយគណបក្សប្រជាជនកម្ពុជានោះទេ។ ដូច្នេះការដើរចេញពីតុចរចារបស់គណបក្សសង្គ្រោះជាតិ គឺមានហេតុផលលំបាកៗច្រើន»។

សម្រាប់ លោក កែម ឡី ការទាមទាររបស់គណបក្សសង្គ្រោះជាតិ ដោយស្នើឲ្យមានការចូលរួមពីអង្គការសហប្រជាជាតិ ក្នុងគណៈកម្មការចម្រុះនោះ ក៏ពិតជាអាចធ្វើទៅបានផងដែរ ព្រោះការចូលរួមនេះ វាមិនមែនជាការជ្រៀតជ្រែកអ្វីមកលើនយោបាយ និងការអនុវត្តច្បាប់នៅកម្ពុជានោះទេ ហើយថា សម្រាប់គណៈកម្មការចម្រុះគឺត្រូវការជាចាំបាច់នូវអ្នកជំនាញបច្ចេកទេសសម្រាប់សិក្សាលើភាពមិនប្រក្រតីដែលបានកើតឡើង។

អ្នកវិភាគរូបនេះបានបញ្ជាក់ថា៖« វិស័យរបស់រដ្ឋស្ទើតែទាំងអស់សុទ្ធតែត្រូវការអ្នកជំនាញបច្ចេកទេសបរទេស ពិសេសក្រុមអង្គការអន្តរជាតិធំៗ ដើម្បីជួយសិក្សា និងស្វែងរកយន្តការដើម្បីពន្លឿនការអភិវឌ្ឍន៍។ ដូច្នេះសម្រាប់គណៈកម្មការចម្រុះវិញ វាក៏ត្រូវការអ្នកជំនាញបច្ចេកទេសច្បាស់លាស់ ដើម្បីសិក្សា ពីភាពមិនប្រក្រតី និងយន្តការនៃការដោះស្រាយបញ្ហាទាំងអស់នោះដែរ»។

បើតាមលោក កែម ឡី ចំពោះបញ្ហាទាំងអស់នេះ វាទាមទារជាចាំបាច់ចំពោះវត្តមានរបស់អ្នកជំនាញបច្ចេកទេស ដើម្បីឲ្យដឹងថា ភាពមិនប្រក្រតីនោះវាបានកើតឡើងកម្រិតណា ហើយវាត្រូវការយន្តការអ្វីខ្លះដើម្បីយកដោះស្រាយ ជាពិសេសដើម្បីឲ្យគ្រប់ភាគីទាំងអស់ទទួលយកបាន៕

ប្រភពដើម៖ សារព័៏ត៌មានថ្មីៗ

អ្នកវិភាគ៖ ការចូលរួមរបស់ UN មិនប៉ះពាល់ដល់ការអនុវត្តច្បាប់របស់ គ.ជ.ប ឡើយ

បញ្ចូលព័ត៌មានដោយ៖Unknown No comments

ប្រភពដើម៖ សារព័៏ត៌មានថ្មីៗ

តំណាងសហជីពមួយចំនួនបានចេញសេចក្ដីថ្លែងការណ៍ទាមទារឲ្យរដ្ឋាភិបាលចាប់ខ្លួនលោក ឈូក បណ្ឌិត ទៅតាមសាលក្រមរបស់តុលាការខែត្រស្វាយរៀង ជាបន្ទាន់ ដើម្បីបង្ហាញថា កម្ពុជាជាប្រទេសគ្មាននិទណ្ឌភាព ឬភាពគ្មានទោសពៃរ៍។ ការទាមទារឲ្យរដ្ឋាភិបាលចាប់ខ្លួនអតីតអភិបាលក្រុងបាវិត ដែលបាញ់ប្រហារទៅលើកម្មករឲ្យរងរបួសធ្ងន់យកដាក់ពន្ធនាគារនេះ ពីព្រោះថា អស់រយៈពេលជាច្រើនខែមកហើយ បន្ទាប់ពីសាលាដំបូងខែត្រស្វាយរៀង ឲ្យលោក ឈូក បណ្ឌិត ជាប់គុក ១ឆ្នាំកន្លះ តែរហូតមកទល់ពេលនេះ លោក ឈូក បណ្ឌិត នៅមានសេរីភាពនៅឡើយ។ តំណាងសហជីពចំនួន ៣ បានចេញសេចក្ដីថ្លែងការណ៍នៅថ្ងៃទី២៤ កក្កដា អំពាវនាវឲ្យរដ្ឋាភិបាលចាប់ខ្លួនលោក ឈូក បណ្ឌិត ជាបន្ទាន់ ដើម្បីបង្ហាញពីឆន្ទៈពិតប្រាកដរបស់រដ្ឋាភិបាលក្នុងការលុបបំបាត់និទណ្ឌភាព។ តំណាងសហជីពនោះរួមមាន តំណាងសហភាពការងារកម្ពុជា សហជីពកម្ពុជា និងសហព័ន្ធសហជីពវាយនភណ្ឌកាត់ដេរ និងតំណាងឲ្យកម្មករនិយោជិតទាំងអស់ បានសម្ដែងនៅក្នុងសេចក្ដីថ្លែងការណ៍យ៉ាងខ្លាំងចំពោះរាជរដ្ឋាភិបាលកម្ពុជា ដែលមិនបានចាប់ខ្លួនលោក ឈូក បណ្ឌិត ដាក់ពន្ធនាគារ ដែលនេះបង្ហាញឲ្យឃើញម្ដងហើយម្ដងទៀតនូវនិទណ្ឌភាព ឬភាពគ្មានទោសពៃរ៍សម្រាប់ជនមានឥទ្ធិពល ដូចជាអតីតអភិបាលក្រុងបាវិត លោក ឈូក បណ្ឌិត នេះ។ ប្រធានសហភាពការងារកម្ពុជា លោក អាត់ ធន់ មានប្រសាសន៍ថា តំណាងសហជីពមួយចំនួនបានចេញសេចក្ដីថ្លែងការណ៍នេះ ក្នុងគោលបំណងឲ្យមន្ត្រីមានសមត្ថកិច្ច ឬក្រសួងមហាផ្ទៃ អនុវត្តសាលក្រមរបស់សាលាដំបូងខែត្រស្វាយរៀង ចាប់ខ្លួនលោក ឈូក បណ្ឌិត យកមកផ្ដន្ទាទោសតាមច្បាប់។ វិទ្យុអាស៊ីសេរី មិនអាចទាក់ទងមន្ត្រីនាំពាក្យក្រសួងមហាផ្ទៃ លោក ខៀវ សភ័គ ដើម្បីសុំបំភ្លឺអំពីបញ្ហានេះបានទេ នៅថ្ងៃទី២៤ កក្កដា ឆ្នាំ២០១៣។ ស្នងការនគរបាលខែត្រស្វាយរៀង លោក កឹង ឃន មិនធ្វើអត្ថាធិប្បាយលំអិតអំពីបញ្ហានេះទេ ដោយលោកប្រាប់ថា ជាប់រវល់ ហើយលោកបញ្ជាក់យ៉ាងខ្លីថា សមត្ថកិច្ចរបស់លោកកំពុងធ្វើការរឿងនេះហើយ។ សាលាដំបូងខេត្តស្វាយរៀង កាលពីថ្ងៃទី២៥ ខែមិថុនា បានកាត់អោយ លោក ឈូក បណ្ឌិត មានទោសរយៈពេល ១ឆ្នាំកន្លះ និងបានចេញដីកាអោយតាមចាប់ខ្លួនអតីតអភិបាលក្រុងបាវិត រូបនេះ អោយមកទទួលទោស និងបានបង្គាប់អោយបង់ប្រាក់សំណងទៅអោយជនរងគ្រោះឈ្មោះ ប៊ុន ចិន្ដា ចំនួន ២០លានរៀល នុត សុខន ១០លានរៀល និង កែវ នា ចំនួន ៨លានរៀល។ ប្រធានសហភាពសហជីពកម្ពុជា លោក រ៉ុង ឈុន បានសង្កត់ធ្ងន់ថា ករណីលោក ឈូក បណ្ឌិត នេះ ប្រសិនបើលោកគ្មានអំណាច ឬគ្មានអ្នកមានឥទ្ធិពលនៅក្រោយខ្នងទេ មន្ត្រីនគរបាលបានចាប់ខ្លួនលោកតាំងពីដើមទីមកម្ល៉េះ ចំពោះទង្វើរបស់លោកដែលបាញ់ប្រហារទៅកម្មការិនីនេះ។ បន្ថែមពីលើនេះទៀត ក្រុមតំណាងសហជីពបានអះអាងថា ពួកគាត់នឹងធ្វើការតវ៉ាជាបន្តបន្ទាប់ទៀតនៅពេលខាងមុខ ប្រសិនបើរដ្ឋាភិបាល ឬក្រសួងមហាផ្ទៃ មិនចាប់ខ្លួនលោក ឈូក បណ្ឌិត ដាក់ពន្ធនាគារតាមអំណាចសាលក្រមរបស់តុលាការ និងត្រូវឲ្យលោក ឈូក បណ្ឌិត បង់សំណងជំងឺចិត្តជូនកម្មការិនីរងគ្រោះទៅតាមសាលក្រមរបស់តុលាការដែលបានកំណត់៕ កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ប្រភពដើម៖RFA