យុវតីខ្មែរកាន់តែមានអ្នកស្លៀកពាក់ សិចស៊ីស្រើបស្រាល មើលទៅគួរឲ្យញាក់សាច់

បញ្ចូលព័ត៌មានដោយ៖Unknown on Saturday, August 24, 2013 0

រាជធានីភ្នំពេញ ៖ យុវតីនៅក្នុងសង្គមខ្មែរយើង កាន់តែមានអ្នកស្លៀកពាក់ សិចស៊ីស្រើបស្រាល មើលទៅគួរឲ្យញាក់សាច់ ហើយការស្លៀកពាក់ ខើចខ្លីរបៀបនេះ នៅតាមទីជនបទ ពុំសូវមានទេ តែបើយើងក្រឡេកមើល ទៅតាមបណ្តាប្រជុំជន សំខាន់ៗដូចជាយុវតី នៅក្នុងទីក្រុងភ្នំពេញតែម្តង ដែលមានការស្លៀកពាក់ខើចលើ ខើចក្រោមយ៉ាងសំបូរបែប។

ចំពោះយុវតីដែលជាសិស្សនិស្សិត នៅតាមសាកលវិទ្យាល័យមួយចំនួន មានទម្លាប់ស្លៀកខ្លីៗទៅតាមចំណង់ចំណូលចិត្ត និងទៅតាមគ្នីគ្នា។ មានភាពប្លែកភ្នែកជាច្រើនដូចជាពីមុនអាវគេសម្រាប់តែពាក់ប៉ុណ្ណោះ តែមកពេលនេះ គេយកអាវទៅស្លៀកជាមួយសំពត់ ឬខោទៅវិញ។ ការស្លៀកពាក់ខ្លីខើចលើ ខើចក្រោមដូច្នេះ គឺវាមិនល្អទេ ព្រោះវាមិនមែនជាប្រពៃណីខ្មែរ ហើយវាគ្រាន់តែការបង្ហាញខ្លួនរបស់យុវតីមួយចំនួន ដែលគ្មានការខ្មាស់អៀនប៉ុណ្ណោះ។

ដូច្នេះយុវតីខ្មែរយើងដែលមានរបៀបគួរតែស្លៀកពាក់ឲ្យបានសមរម្យ ដោយមិនត្រូវស្លៀកពាក់បង្ហាញភាពសិចស៊ីពេកទេ ព្រោះវាអាចឲ្យប្រុសៗមើលងាយ និងរិះគន់ដោយមិនសំចៃមាត់ឡើយ។ វាមិនគ្រាន់តែបានបង្ហាញឲ្យឃើញភាពស៊ីវិល័យប៉ុណ្ណោះទេ ថែមទាំងបានបង្ហាញភាពស្រៀវស្រើបនិងរំជើបរំជួល។ ភាពស្រៀវស្រើបបែបនេះជាទង្វើដែលបានប៉ះពាល់ដល់ប្រពៃណីខ្មែរនិងបានបង្ហាញនូវចរឹតលក្ខណៈអសីលធម៌ ដែលអាចនាំទុក្ខដល់ខ្លួនឯង។

បញ្ហានេះក៏អាចមានការប៉ះពាល់ដល់សតិអារម្មរណ៍ និងសុវត្ថិភាពផ្ទាល់ខ្លួនផងដែរ ព្រោះការស្លៀកពាក់ខើចខ្លី ធ្វើឲ្យមនុស្សប្រុសមានអារម្មណ៍ស្រើបស្រាល ដែលអាចជំរុញឲ្យមានអំពើចាប់រំលោភសេពសន្ថវៈ។ ប្រសិនបើយុវតីខ្មែររៀនទម្លាប់ស្លៀកពាក់ខ្លីសមល្មមនោះ វាមិនមានការប៉ះទង្គិចទៅលើវប្បធម៌ប្រពៃណីខ្មែរឬនាំឲ្យមានផលវិបាកសម្រាប់ខ្លួនឯងនោះទេ។

ការស្លៀកពាក់របៀបសិចស៊ីរបស់យុវតីមួយចំនួន ជាពិសេសសិស្សនិស្សិតនោះ គឺមើលទៅវាមិនសមរម្យទេ ព្រោះថា ការស្លៀកពាក់បែបហ្នឹងវាហួសហេតុពេក។ អ្នកដែលបានស្លៀកខ្លីៗ សិចស៊ីទាំងនោះ នៅពេលដែលគេជិះម៉ូតូទៅណាមកណា គេតែងតែយកអាវសម្រាប់ពាក់ ទៅគ្របបាំងបិទពីលើ។ ការបិទបាំងរបៀបនេះ ជូនកាលធ្វើឲ្យមានគ្រោះថ្នាក់ចរាចរណ៍ដល់ខ្លួនឯង និងអ្នកដទៃដែលធ្វើដំណើរតាមផ្លូវជាយថាហេតុ៕