CPP និង CNRP ជួបចរចាជាថ្មីលើកំណែទម្រង់នៃការបោះឆ្នោត

បញ្ចូលព័ត៌មានដោយ៖Unknown on Tuesday, February 18, 2014 0

ភ្នំពេញ៖ ក្រោយពេលការខ្វែងគំនិតផ្នែកនយោបាយ រយៈពេលជិត ៧ខែកន្លងទៅ គណបក្សទទួល បានអាសនៈ នៅក្នុងសភាទាំងពីរ គឺគណបក្ស ប្រជាជនកម្ពុជា (CPP) និងគណបក្សសង្រ្គោះជាតិ (CNRP) និងបើកការជួបចរចាគ្នាជាថ្មីនៅវេលាម៉ោង ៩ព្រឹកថ្ងៃទី១៨ ខែកុម្ភៈ ឆ្នាំ២០១៤នេះ នៅវិមាន ព្រឹទ្ធរដ្ឋសភា។

ជំនួបចរចាក្រោមការអន្ទះសារចង់ដឹងពីលទ្ធផលរបស់ម្ចាស់ឆ្នោតនេះ គណបក្សប្រជាជនកម្ពុជាមានសមាសភាព ៣ នាក់ រួមមាន៖ លោក ព្រុំ សុខា, លោក សក់ សេដ្ឋា និង លោក កើត រិទ្ធិ។ រីឯភាគីគណបក្សសង្រ្គោះជាតិវិញ ក៏មានសមាសភាព៣នាក់ផងដែររួមមាន៖លោក សុន ឆ័យ, លោក យ៉ែម បុញ្ញឬទ្ធិ និងលោក គួយ ប៊ុនរឿន។

តាមសេចក្តីប្រកាសព័ត៌មានរបស់គណបក្សប្រជាជនកម្ពុជា កាលពីថ្ងៃទី១៥ ខែកុម្ភៈ ឆ្នាំ២០១៤ បានបញ្ជាក់ថា ជំនួបចរចានេះ ធ្វើឡើងដើម្បីរៀបចំបង្កើតយន្តការកំណែទម្រង់បោះឆ្នោតនាពេលខាង មុខ ស្របតាមស្មារតីសេចក្តីប្រកាសរួម នៃជំនួបកំពូលរវាងគណបក្សប្រជាជនកម្ពុជា និងគណបក្សសង្រ្គោះជាតិកាលពីថ្ងៃទី១៦ ខែកញ្ញា ឆ្នាំ២០១៣។

គណបក្សសង្រ្គោះជាតិ នៅក្នុងសេចក្តីថ្លែងការណ៍ឆ្លើយតបទៅគណបក្សប្រជា ជនកម្ពុជា នាថ្ងៃទី១៦ ខែកុម្ភៈ ឆ្នាំ ២០១៤ ក៏បានបញ្ជាក់ដូចគ្នាដែរថា ជំនួបចរចានេះធ្វើឡើងដើម្បីដោះស្រាយភាពជាប់គាំងនយោបាយ បច្ចុប្បន្ន ដែលបណ្តាលមកពីភាពមិនប្រក្រតីយ៉ាងធ្ងន់ធ្ងរនៃការ បោះឆ្នោត ឆ្នាំ២០១៣កន្លងមក និងអនុវត្តន៍តាមកិច្ចព្រម ព្រៀងនៅក្នុងសេចក្តីថ្លែងការណ៍ រួមកាលពីថ្ងៃទី១៦ ខែកញ្ញា ឆ្នាំ២០១៣ និងដើម្បីរៀបចំយន្តការ កែទម្រង់ការ បោះឆ្នោត នាពេលខាងមុខ។

ទោះបីជាគណបក្ស ដែលទទួលបានអាសនៈនៅក្នុងសភានីតិកាលទី៥ ទាំងពីរសុទ្ធតែអះអាងថាប្រធានបទនៃ កិច្ចចរចានិយាយតែលើយន្តការកំណែទម្រង់ការបោះឆ្នោតក្តី តែប្រជាពលរដ្ឋជាម្ចាស់ឆ្នោតនៅតែសម្តែងការរំពឹងទុកថាកិច្ចចរចា តទល់រវាងមន្រ្តី នៃគណបក្សនយោបាយទាំងពីរនឹងអាចឈានទៅរកនូវដំណោះស្រាយ នៃការខ្វែងគំនិតផ្សេងៗទៀត ឈានទៅដល់ការយោគយល់គ្នា ចូលទៅកាន់កៅអីសភាក្រោមម្លប់ស្វេតឆ័ត្ររបស់ព្រះ មហាក្សត្រធ្វើការរួមគ្នា ដើម្បីឧត្តម ប្រយោជន៍របស់ប្រទេសជាតិ និងប្រជាពលរដ្ឋជាម្ចាស់ឆ្នោត។

សូមបញ្ជាក់ថា ការកើតទុក្ខមិនសុខចិត្តរបស់គណបក្សសង្រ្គោះជាតិ លើលទ្ធផលឆ្នោត ដែល ប្រកាស ដោយ គណៈកម្មាធិការជាតិ រៀបចំការបោះឆ្នោត (គ.ជ.ប) បានធ្វើឲ្យគណបក្សប្រឆាំងនៅកម្ពុជាមួយនេះ មិនចូលប្រជុំសភាលើកដំបូងតាមការកោះហៅរបស់ព្រះ មហាក្សត្រកាលពីថ្ងៃទី២៣ ខែកុម្ភៈ ឆ្នាំ២០១៣។ ការពហិការកិច្ចប្រជុំសភាលើកដំបូងរបស់គណបក្សសង្រ្គោះជាតិ ធ្វើឲ្យរដ្ឋសភាត្រូវបង្ខំចិត្តដំណើរការដោយមានតែតំណាងរាស្ត្រ មកពីគណបក្សប្រជាជនកម្ពុជា។

ក្រៅពីការមិនចូលរួមកិច្ចប្រជុំសភាហើយនោះ ក្នុងរយៈពេលជាច្រើនខែមកនេះ គណបក្ស សង្រ្គោះជាតិ តែងបាន ប្រមូលផ្តុំអ្នកគាំទ្ររបស់ខ្លួនធ្វើការតវ៉ា និងធ្វើមហាបាតុកម្មបញ្ចេញ ការទាមទារ និងប្រឆាំងទៅនឹងរាជរដ្ឋាភិបាល កម្ពុជា ដែលកើតចេញពីគណបក្សប្រជាជនកម្ពុជាថែមទៀតផង។

ការខ្វែងគំនិតរបស់បក្សនយោបាយទាំងពីរ ក៏បានបង្កនូវភាពសោកស្តាយជាពន់ពេកផងដែរ ពីសំណាក់ប្រជាពល រដ្ឋជាម្ចាស់ឆ្នោត ដោយពួកគាត់មើលឃើញថា សកម្មភាពទាំងនេះ ហាក់មិនបានជួយជ្រោមជ្រែងឲ្យជាតិរីក ចម្រើន និងនាំមកនូវប្រយោជន៍ជូនពួកគាត់នោះទេ៕

ប្រភពព័ត៌មាន៖ គេហទំព័រដើមអម្ពិល