គណបក្សធំទាំងពីរត្រៀមចូលតុចរចា ប្រធានបទរួមគឺកំណែទម្រង់បោះឆ្នោត

បញ្ចូលព័ត៌មានដោយ៖Unknown on Saturday, October 26, 2013 0

បន្ទាប់ពីមហាបាតុកម្មរយៈពេលបីថ្ងៃរបស់គណបក្សសង្គ្រោះជាតិ នៅទីលានប្រជាធិបតេយ្យរួចមក មន្ត្រីជាន់ខ្ពស់ទាំងគណបក្សប្រជាជនកម្ពុជា និងគណបក្សសង្គ្រោះជាតិ បានបញ្ជាក់ពីគោលជំហរនៃការចរចាថា កំណែទម្រង់បោះឆ្នោត គឺជាចំនុចរួមដែលត្រូវចរចាគ្នា ដើម្បីបិទបញ្ចប់វិបត្តិនយោបាយ នៅកម្ពុជា។ យ៉ាងណាក៏ដោយ មន្ត្រីគណបក្សទាំងពីរមិនទាន់ដាក់ថ្ងៃកំណត់នៃការចរចានៅឡើយទេ។

សេចក្តីរាយកាណ៍របស់ ញឹម សុផល

(01:53)

គណបក្សជាប់ឆ្នោតធំៗទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ បានបន្ទន់ជំហររបស់ខ្លួនស្តីពីវិបត្តិនយោបាយនៅកម្ពុជា ដែលកំពុងតែបន្តញាំញីនេះហើយ។

មន្ត្រីជាន់ខ្ពស់ការិយាល័យនយោបាយគណបក្សប្រជាជនកម្ពុជា លោកស ខេង បានថ្លែងប្រាប់វិទ្យុបារាំងអន្តរជាតិRFIថា បើទោះបីជាគណបក្សទាំងពីរមិនទាន់កំណត់ថ្ងៃចរចាជាមួយគ្នាឡើងវិញក៏ដោយ ប៉ុន្តែ លោកថាបញ្ហាកំណែទម្រង់បោះឆ្នោត ដែលគណបក្សសង្គ្រោះជាតិ និងគណបក្សប្រជាជនកម្ពុជា បានយល់ព្រមជាមួយគ្នាក្នុងការចរចា កាលពីពាក់កណ្តាលខែកញ្ញាកន្លងទៅ គឺគួរយកមកអនុវត្តមុនដំបូងគេបង្អស់។ ហើយលោកថា ប្រសិនបើគណបក្សសង្គ្រោះជាតិទាមទារឱ្យដោះស្រាយបញ្ហាម្តងទាំងកញ្ចប់នោះ គឺពិតជាលំបាកដើម្បីបញ្ចប់វិបត្តិនយោបាយនេះណាស់។

វិបត្តិនយោបាយគឺស្តែងចេញពីភាពមិនប្រក្រតីនៃការបោះឆ្នោតក្នុងអាណត្តិទី៥នេះ។ ហើយសម្រាប់បញ្ហាទាំងអស់នេះ លោក ស ខេង បានបញ្ជាក់ថា លោកបានទំនាក់ទំនងជាមួយលោក សម រង្ស៊ី ប្រធានគណបក្សសង្គ្រោះជាតិ រួចអស់ហើយ។ ប៉ុន្តែលោកមិនបានបញ្ជាក់បន្ថែមថាយ៉ាងណានោះទេ។

អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានលើកឡើងដែរថា បញ្ហាចំបងរបស់គណបក្សសង្គ្រោះជាតិ ដែលនឹងត្រូវចរចាជាមួយគណបក្សប្រជាជននោះ នាពេលខាងមុខនោះ គឺបញ្ហាកំណែទម្រង់នៃការបោះឆ្នោត។ អ្នកនាំពាក្យរូបនេះបន្តថា សូម្បីតែគណបក្សប្រជាជនកម្ពុជាខ្លួនឯង ក៏បានទទួលស្គាល់អំពីភាពមិនប្រក្រតីនៃការបោះឆ្នោតផងដែរ ដោយគណបក្សកាន់អំណាចមួយនេះ បានប្រកាសឱ្យមានកំណែទម្រង់។

គួររំលឹកថា ដោយសារតែភាពមិនប្រក្រតីនៃការបោះឆ្នោត គណបក្សសង្គ្រោះជាតិ ដែលមានសម្លេងឆ្នោតក្នុងសភានោះ បានធ្វើពហិការមិនចូលរួមប្រជុំសភា និងទាត់ចោលលទ្ធផលនៃការបោះឆ្នោត។ ហើយបានដឹកនាំប្រជាពលរដ្ឋរ៉ាប់ម៉ឺននាក់ ធ្វើបាតុកម្មប្រឆាំងលទ្ធផលបោះឆ្នោត និងទាមទាររកយុត្តិធម៌នៃការបោះឆ្នោត។

យ៉ាងណាក៏ដោយ គណបក្សធំៗទាំងពីរបានបញ្ជាក់ថា ថ្ងៃជួបចរចាសាជាថ្មីនោះមិនទាន់បានកំណត់នោះទេ បើទោះបីជាគណបក្សជាប់ឆ្នោតទាំងពីរបានដាក់គោលដៅរួមគ្នាគឺកំណែទម្រង់បោះឆ្នោតយ៉ាងណាក៏ដោយ៕

ប្រភពព័ត៌មាន៖ វិទ្យុបារាំងអន្តរជាតិ

បញ្ជាក់៖ រាល់អត្ថបទ និងរូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann IT ឡើយ ការចំលងផ្សព្វផ្សាយចែកចាយបន្ត គឺជាការទទួលខុសត្រូវរបស់សាម៉ីជន...សូមអរគុណ!!!