ទីស្តីការគណៈរដ្ឋមន្ត្រីមានទីប្រឹក្សានិងជំនួយការជាង ៦០នាក់

បញ្ចូលព័ត៌មានដោយ៖Unknown on Saturday, October 19, 2013 0

ស្ថាប័នរដ្ឋនានាសម្រាប់រដ្ឋាភិបាលអាណត្តិទី៥នេះបានតែងតាំងទីប្រឹក្សា និងជំនួយការរបស់ខ្លួនជាបន្តបន្ទាប់។ ទីស្តីការគណៈរដ្ឋមន្ត្រីដែលដឹកនាំដោយលោកឧបនាយករដ្ឋមន្ត្រី សុខ អាន មានទីប្រឹក្សា និងជំនួយការសរុប ជាង៦០នាក់។ នេះបើយោងតាមព្រះរាជក្រឹត្យចុះថ្ងៃទី១៦ តុលា។ ការតែងតាំងទីប្រឹក្សានិងជំនួយការរបស់រដ្ឋាភិបាល ក៏ដូចជារបស់ស្ថាប័នរដ្ឋនានានៅតែមានចំនួនច្រើនដដែលបើទោះបីជាមានការកាត់បន្ថយនៅក្នុងស្ថាប័នខ្លះក្តី។

សេចក្តីរាយកាណ៍របស់ ប៉ែន បូណា

(01:54)

ទីស្តីការគណៈរដ្ឋមន្ត្រីដែលដឹកនាំដោយលោកឧបនាយករដ្ឋមន្ត្រី សុខ អាន មានទីប្រឹក្សាចំនួន ៥១ នាក់ និងជំនួយការចំនួន ១១ នាក់ ដែលសរុបទាំងអស់ចំនួន ៦២ នាក់។ នេះបើយោងតាមព្រះរាជក្រឹត្យតែងតាំងរបស់ព្រះមហាក្សត្រចុះថ្ងៃទី ១៦ តុលា។ ព្រះរាជក្រឹត្យដដែលនេះក៏បានតែងតាំងទីប្រឹក្សាអាជ្ញាធរអប្សរា២នាក់ និងទីប្រឹក្សា បូកនឹងជំនួយការរបស់រាជបណ្ឌិតសភាដែលស្ថិតក្រោមចំណុះរបស់ទីស្តីការគណៈរដ្ឋមន្ត្រីដដែលចំនួន ១៣ នាក់ផ្សេងទៀត។

គួរបញ្ជាក់ថា រដ្ឋាភិបាលថ្មីអាណត្តិទី៥របស់លោកនាយករដ្ឋមន្ត្រី ហ៊ុន សែន នៅតែជារដ្ឋាភិបាលមានសមាសភាពចាស់ភាគច្រើននិងជារដ្ឋាភិបាលដែលមានមន្ត្រីកាន់តំណែង មន្ត្រីទីប្រឹក្សា និងជំនួយការច្រើនដដែល។ រដ្ឋាភិបាលនេះមានអមដោយឧបនាយករដ្ឋមន្ត្រី ៩រូប ទេសរដ្ឋមន្ត្រី ១៥រូប និងរដ្ឋមន្ត្រីប្រតិភូអមនាយករដ្ឋមន្ត្រីចំនួន១៣នាក់។ នេះនៅមិនទាន់រាប់រដ្ឋលេខាធិការ និងអនុរដ្ឋលេខាដ៏ច្រើនសន្ធឹកសន្ធាប់ផ្សេងទៀតផងទេ។ ក្រៅពីនោះ ក៏នៅមានទីប្រឹក្សានិងជំនួយការរបស់ស្ថាប័ននីមួយៗជាច្រើនទៀត។

កន្លងទៅនេះ ការតែងតាំងទីប្រឹក្សានិងជំនួយការ និងការបែងចែកតួនាទីក្នុងស្ថាប័នរដ្ឋនានាតែងទទួលការរិះគន់ពីបក្សប្រឆាំងនិងងសង្គមស៊ីវិលថាធ្វើឡើងដោយគ្មានតម្លាភាពនិងគ្មានប្រសិទ្ធភាពដែលជាការខ្ជះខ្ជាយថវិកាជាតិ។ នៅក្នុងកិច្ចប្រជុំគណៈរដ្ឋមន្ត្រីថ្មីកាលពីថ្ងៃទី ២៥ កញ្ញា លោកនាយករដ្ឋមន្ត្រី ហ៊ុន សែន បានបង្ហាញគោលនយោបាយកំណែទម្រង់មួយចំនួន។ ការកាត់បន្ថយចំនួនទីប្រឹក្សានិងជំនួយការមិនចាំបាច់ក៏ជាគោលដៅរបស់រដ្ឋាភិបាលថ្មីនេះដែរ។

យ៉ាងណាក៏ដោយ គេនៅតែកត់សម្គាល់ឃើញថា ចំនួនមន្ត្រីក្នុងតំណែងនៅតែមានច្រើនលើសពីតម្រូវការ ខណៈដែលប្រសិទ្ធភាពការងារមិនសូវមានប៉ុន្មាននៅឡើយ។ ទីស្តីការគណៈរដ្ឋមន្ត្រីដែលមានស្ថាប័នជាច្រើនស្ថិតនៅក្រោមចំណុះរបស់ខ្លួននោះក៏មានមន្ត្រី ទីប្រឹក្សា និងជំនួយការយ៉ាងច្រើនគួរឲ្យកត់សម្គាល់ដែរ៕

ប្រភពព័ត៌មាន៖ វិទ្យុអាស៊ីសេរី

បញ្ជាក់៖រាល់អត្ថបទ និង រូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann IT ឡើយ ការចំលងផ្សព្វផ្សាយចែកចាយបន្ត គឺជាការទទួលខុសត្រូវរបស់សាម៉ីជន...សូមអរគុណ!!!