សមាជមហាជនគណបក្សសង្គ្រោះជាតិសម្រេចធ្វើមហាបាតុកម្មនៅទូទាំងប្រទេស

បញ្ចូលព័ត៌មានដោយ៖Unknown on Sunday, October 6, 2013 0

ដូចការ គ្រោងទុកសមាជមហាជនរបស់គណបក្សសង្គ្រោះជាតិបានចាប់ផ្តើមនៅរសៀលថ្ងៃអាទិត្យនេះ ក្រោមការដឹកនាំរបស់លោក សម រង្ស៊ី ប្រធានគណបក្ស និងលោក កឹម សុខាអនុប្រធានគណបក្សសង្គ្រោះជាតិ។ សមាជមហាជនដែលមានប្រជាពលរដ្ឋចូលរួមប្រមាណជាង១ម៉ឺននាក់ ដោយមានការជួបជុំថ្លែងសារនយោបាយ និងលើកឡើងពីកង្វល់ផ្សេងរបស់តំណាងអ្នកចូលរួម នៅក្រោមតំណក់ភ្លៀងបន្តិចបន្តួច។ អង្គសមាជបានសម្រេចទៅលើចំណុចមួយចំនួន ក្នុងនោះ បានប្រកាសថា នឹងធ្វើមហាបាតុកម្មនៅទូទាំងប្រទេសនៅថ្ងៃ២៣ តុលាខាងមុខនេះ។

សេចក្តីរាយកាណ៍របស់ គឹម យុទ្ធណា

(01:54)

បន្ទាប់ពីឡើងសំដែងមតិរបស់អ្នកចូលរួមជាតំណាងកម្មករ កសិករ និស្សិត អាជីវករ មន្ត្រីរាជការ និងព្រះសង្ឃ ជុំវិញគោលជំហររបស់គណបក្សសង្គ្រោះជាតិរួចមក។ នៅទីបំផុតសមាជមហាជនរបស់គណបក្សប្រឆាំងមួយនេះ បានសម្រេចលើចំណុចមួយចំនួនដូចជា មិនចូលរួមបង្កើតសភា និងរដ្ឋាភិបាលជាមួយគណបក្សប្រជាជនកម្ពុជា។ សម្រេចធ្វើមហាបាតុកម្មទូទាំងប្រទេស ដោយមានការចូលរួមពីមន្ត្រីរាជការ សិស្សនិស្សិត និងអាជីវករ។ គោលបំណងសំខាន់របស់មហាតុកម្មនៅទូទាំងប្រទេសនៅពេលខាងមុខនេះ គឺ ដើម្បីទាមទារឲ្យមានការដោះស្រាយបញ្ហាភាពមិនប្រក្រតីនៃការបោះឆ្នោតនាពេលកន្លងទៅ។

លោក សម រង្ស៊ី និង លោក កឹម សុខា បានថ្លែងពីជំហររបស់ថ្នាក់ដឹកនាំគណបក្សទៅកាន់អ្នកគាំទ្រទាំងហាលភ្លៀងថា នឹងមិនចូលរួមបង្កើតសភា និងរដ្ឋាភិបាលជាមួយគណបក្សប្រជាជនកម្ពុជានោះទេ ដរាបណាមិនមានការស៊ើបអង្កេតដោះស្រាយបញ្ហាភាពមិនប្រក្រតីនៅពេលបោះឆ្នោត ដើម្បីរកយុត្តិធម៌ជូនម្ចាស់ឆ្នោតឲ្យបានជ្រះស្រឡះនោះ។

លោក សម រង្ស៊ី ថ្លែងបញ្ជាក់ទៅកាន់អ្នកគាំទ្រ ម្តងហើយម្តងទៀតថា លោកមិនចួលរួមជាមួយអ្នកដែលលួចសន្លឹកឆ្នោតរបស់ប្រជាពលរដ្ឋនោះឡើយ។ លោកថ្លែងបញ្ជាក់ថា ថ្នាក់ដឹកនាំគណបក្សសង្គ្រោះជាតិត្រូវតែគោរពតាមឆន្ទៈរបស់ប្រជាពលរដ្ឋជាម្ចាស់ឆ្នោត ហើយសមាជននៅពេលនេះ ជាការបង្ហាញពីឆន្ទៈរបស់ប្រជាពលរដ្ឋខ្មែរយ៉ាងពិតប្រាកដ។

គួរបញ្ជាក់ថា អ្នកចូលរួមសមាជមហាជនរបស់គណបក្សសង្គ្រោះជាតិ ក្រៅតែពីបានឡើងថ្លែងពីបំណងចង់បានរបស់ខ្លួន ពួកគេបាននាំគ្នាប្រមូលស្នាមមេដៃ ផ្តិតមេដៃលើញត្តិ សម្រាប់ដាក់ជូនលោក បាន គីមូនអគ្គលេខាធិការអង្គការសហប្រជាជាតិ។ ពិសេសផ្ញើទៅប្រទេសហត្ថលេខី នៃកិច្ចព្រមព្រៀងទីក្រុងបារីស ២៣ តុលា ឲ្យជួយដោះស្រាយបញ្ហាវិបត្តិនយោបាយនៅប្រទេសកម្ពុជានាពេលបច្ចុប្បន្ននេះ។

ជាញ្ញតិដែលអំពាវនាវអោយប្រទេសហត្ថលេខីនៃកិច្ចព្រមព្រៀងទីក្រុងប៉ារីសស្តីពី កម្ពុជា ពិនិត្យឡើងវិញនូវការអនុវត្តកិច្ចព្រមព្រៀងនេះ ទាក់ទងនឹងការបោះឆ្នោត ការគោរពសិទ្ធិមនុស្ស និងបូរណភាពទឹកដីជាដើម របស់អ្នកដឹកនាំនយោបាយប្រទេសកម្ពុជាបច្ចុប្បន្ន៕

ប្រភពព័ត៌មាន៖ វិទ្យុបារាំងអន្តរជាតិ

បញ្ជាក់៖ រាល់អត្ថបទ និង រូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann IT ឡើយការចំលងចែកចាយផ្សព្វផ្សាយបន្ត គឺជាការទទួលខុសត្រូវរបស់សាម៉ីជន...សូមអរគុណ!!!