តំណាងរាស្រ្ត CNRP សម្រេចបោះចោល តំណែងអនុប្រធាន និងប្រធានគណៈ កម្មការក្នុងសភា

បញ្ចូលព័ត៌មានដោយ៖Unknown on Monday, September 23, 2013 0

ភ្នំពេញ៖ ប្រភពព័ត៌មានចុងក្រោយចេញពីគណបក្ស សង្រ្គោះជាតិ (CNRP) នៅក្រោយ កិច្ចប្រជុំរវាង ថ្នាក់ដឹកនាំ និងសមា ជិកជាតំណាងរាស្រ្តជាប់ឆ្នោត គណបក្ស សង្រ្គោះជាតិ នាក្រុងសៀមរាបនោះ បានសម្រេចបោះបង់ចោលតំណែង អនុប្រធានសភា និងប្រធាន គណៈកម្មការចំនួន៤ទៀត នៅក្នុងសភា ហើយពួកគេក៏មិនត្រឡប់មកចូលប្រជុំសភា នៅថ្ងៃទី២៤ ខែកញ្ញា នោះដែរ។



បន្ទាប់ពីតាមប្រមាញ់ព័ត៌មានពេញមួយថ្ងៃពីលទ្ធផល នៃកិច្ចប្រជុំពិភាក្សាថ្នាក់ដឹកនាំគណបក្សសង្រ្គោះជាតិ និង មានលិចឮនូវព័ត៌មានផ្សេងៗនោះ រហូតដល់យប់ថ្ងៃទី២៣ ខែកញ្ញា ឆ្នាំ២០១៣ លទ្ធផលបានបញ្ជាក់ថា តំណាង រាស្រ្តជាប់ឆ្នោតគណបក្សសង្រ្គោះជាតិទាំងអស់ បានសម្រេចបោះចោលតំណែង អនុប្រធានសភា និងប្រធាន គណៈកម្មការចំនួន ៤ផ្សេងទៀត ដែលគណបក្សប្រជាជនកម្ពុជាប្រគល់ឲ្យតាមរយៈការចរចានាពេលកន្លងមក នោះ។

ការបោះបង់នេះ មិនត្រូវបានប្រភពទម្លាយពីមូលហេតុនោះទេ តែលោក សម រង្ស៊ី ប្រធានគណបក្សសង្រ្គោះជាតិ ធ្លាប់បានថ្លែងថា លោកនឹងធ្វើការតវ៉ាទាមទារឲ្យមាន តុល្យភាពអំណាចនៅក្នុងរដ្ឋសភា ដើម្បីតស៊ូមតិនានា។ តែប្រហែលជាបណ្តាលមកពីការទាមទារមិនបាននេះហើយ ទើបលោក សម រង្ស៊ី និងតំណាងរាស្រ្តរបស់ ខ្លួនទាំងអស់ សម្រេចបោះបង់ចោលតំណែងទាំងអស់ក្នុងសភា រក្សាទុកតែតួនាទីជាសមាជិកសភាប៉ុណ្ណោះ។

បើទាមទារតុល្យភាពអំណាចក្នុងសភាមិនបានទៅហើយ សម្រេចបោះចោលទាំងអស់តែម្តងទៅ ព្រោះការបោះ ចោលនេះ ស្របតាមឆន្ទៈរបស់ប្រជាពលរដ្ឋ ក៏ដូចជាការសន្យារបស់ខ្លួនចំពោះម្ចាស់ឆ្នោតថា គណបក្សសង្រ្គោះ ជាតិ នឹងមិនចរចាបែងចែកអំណាចណាមួយជាមួយគណបក្សប្រជាជនកម្ពុជានោះទេ។

ប្រភពព័ត៌មានចុងក្រោយនេះ បានឲ្យដឹងផងដែរថា តំណាងរាស្រ្តជាប់ឆ្នោតគណបក្សសង្រ្គោះជាតិទាំង ៥៥រូប ក៏នឹងមិនត្រឡប់ពីខេត្តសៀមរាប មកចូលរួមប្រជុំសភានៅថ្ងៃស្អែក ជាមួយគណបក្សប្រជាជនកម្ពុជានោះដែរ ដោយគ្រោងធ្វើដំណើរ ទៅជួបប្រជាពលរដ្ឋអ្នកគាំទ្ររបស់ខ្លួន នៅតាមបណ្តាខេត្តនានា ដែលពួកគេទទួលបានសំឡេងឆ្នោត៕

ប្រភពព័ត៌មាន៖ គេហទំព័ដើមអម្ពិល

បញ្ជាក់៖​រាល់អត្ថបទ និង​រូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann IT ឡើយ​ការចំលងចែកចាយ ផ្សព្វផ្សាយបន្ត គឺជាការទទួលខុសត្រូវរបស់សាម៉ីជន...​សូមអរគុណ!!!