លេចធ្លាយលិខិតរបស់លោកកឹមសុខា ជូនសម្តេចហ៊ុនសែន នៅថ្ងៃប្រជុំរដ្ឋសភា លើកដំបូង

បញ្ចូលព័ត៌មានដោយ៖Unknown on Monday, September 23, 2013 0

ភ្នំពេញ: នៅព្រឹកព្រលឹមថ្ងៃចន្ទ ទី២៣កញ្ញានេះ មានការផ្សព្វផ្សាយនូវលិខិតរបស់លោក កឹម សុខា អនុប្រធានគណបក្សសង្គ្រោះជាតិ ផ្ញើជូនសម្តេច ហ៊ុន សែន អនុប្រធានគណបក្សប្រជាជនកម្ពុជា។ ក្នុងលិខិតចុះថ្ងៃទី២២ ខែកញ្ញា ឆ្នាំ២០១៣ ដែលមានចុះហត្ថលេខារបស់លោក កឹម សុខា បានបង្ហាញពីការសន្យារបស់សម្តេច ហ៊ុន សែន ក្នុងការផ្តល់តួនាទីជាអនុប្រធានរដ្ឋសភាដល់លោកកឹមសុខា និងផ្តល់តួនាទីជាប្រធានគណៈកម្មការជំនាញរដ្ឋសភា ចំនួន ៤ ទៀត ដល់សមាជិកសភារបស់គណបក្សសង្គ្រោះជាតិ។

ក្នុងលិខិតដដែលនោះ លោក កឹម សុខា បានបញ្ជាក់ថា លោកព្រមទទួលយកតំណែង អនុប្រធានរដ្ឋសភាទី១ និងប្រធានគណៈកម្មការចំនួន ៤ នៃរដ្ឋសភា ដើម្បីជាថ្នូរនឹងការចូលរួមប្រជុំរដ្ឋសភា លើកដំបូង នាព្រឹកថ្ងៃទី២៣កញ្ញានេះ។ ប៉ុន្តែក្រុមតំណាងរាស្ត្រ ២៣ រូប ដែលដឹកនាំដោយរូបលោកកឹមសុខា មិនអាចមកចូលរួមបាន ដោយសារតែលោកសមរង្ស៊ី បង្ខំឲ្យស្នាក់នៅជាមួយគ្នា នៅខេត្តសៀមរាប។

ក្នុងលិខិតដដែលនោះ បង្ហាញថា គណបក្សប្រជាជនកម្ពុជា ព្រមព្រៀងផ្តល់ឲ្យលោក កឹម សុខា ជាអនុប្រធានទី១ រដ្ឋសភា និងលោក ប៉ែន សុវណ្ណ លោក ប៉ុល ហំម លោក ឃីវណ្ណដេត និងលោក ម៉ៅ មុនីវណ្ណ ជាប្រធានគណៈកម្មការចំនួន ៤ នៃរដ្ឋសភា។

ក្នុងលិខិត ដែលមានចុះហត្ថលេខារបស់លោក កឹម សុខា បានបញ្ជាក់ថា "ប្រសិនបើមានការគាំទ្រ និងផ្តល់ឋានៈទាំងនោះ ដល់យើងខ្ញុំពិតប្រាកដមែន យើងខ្ញុំសូមសន្យាថា នឹងបន្តចូលរួមក្នុងសម័យប្រជុំនៃរដ្ឋសភា នាពេលក្រោយៗទៀត តាមការកោះអញ្ជើញរបស់រដ្ឋសភាជាមិនខាន"។

លោក កឹម សុខា ដែលកំពុងស្ថិតនៅខេត្តសៀមរាប នាព្រឹកថ្ងៃចន្ទ ទី២៣កញ្ញានេះ មិនទាន់អាចទាក់ទងបានទេ ដោយជំនួយការរបស់លោក ប្រាប់ថា លោក និងលោកសមរង្ស៊ី កំពុងជួបប្រជុំជាមួយក្រុមបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ នៅក្នុងសណ្ឋាគារ នៅទីរួមខេត្តសៀមរាប មុននឹងចេញដំណើរទៅកាន់បិណ្ឌ នៅក្នុងវត្តមួយ នាព្រឹកថ្ងៃចន្ទនេះ៕

ប្រភពព័ត៌មាន៖ CEN

បញ្ជាក់៖ រាល់អត្ថបទ និងរូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann IT ឡើយ ការចំលងចែកចាយ ផ្សព្វផ្សាយបន្ត គឺជាការទទួលខុសត្រូវរបស់សាម៉ីជន...សូមអរគុណ!!