អំពើពុករលួយដុះស្លែ លើបញ្ហាគ្រប់គ្រងដីធ្លី របស់លោក សូ សុខ នាំឲ្យគណបក្សប្រជាជន ខាតបង់សន្លឹកឆ្នោតនៅខេត្តព្រះសីហនុ

បញ្ចូលព័ត៌មានដោយ៖Unknown on Tuesday, August 13, 2013 0

ខេត្តព្រះសីហនុ ៖ ប្រជាពលរដ្ឋ និងមន្ត្រីមូលដ្ឋានមួយចំនួន បានរអ៊ូរទាំថា ដំណើរការ បោះឆ្នោតជាតិ អាណត្តិទី៥ ដែលទើបតែបញ្ចប់ បានធ្វើឲ្យគណបក្ស ប្រជាជនកម្ពុជា នៅខេត្តព្រះសីហនុ ខាតបង់សន្លឹកឆ្នោត ច្រើនសន្ធឹកសន្ធាប់ ហើយគេសង្ស័យថា រឿងធំបំផុតនោះ គឺផ្តើមចេញពី អំពើពុករលួយដុះស្លែ និងការតាំងខ្លួនជាស្តេចត្រាញ់ លើបញ្ហាគ្រប់គ្រងដីធ្លីរបស់លោក សូ សុខ ឬ លូ សុខ ដែលជាប្រធានមន្ទីរ សុរិយោដីនិងសំណង់ ខេត្តព្រះសីហនុ ដែលតែងតែធ្វើឲ្យ ប្រជាពលរដ្ឋក្តៅក្រហាយ មិនចេះចប់។

ប្រជាពលរដ្ឋ បានលើកឡើងថា លោក សូ សុខ ដែលជាប្រធានមន្ទីរ សុរិយោដីនិងសំណង់ ខេត្តព្រះសីហនុ គឺជាមនុស្សក្រាញអំណាចដុះស្លែ និងកំពុងតាំងខ្លួនជាស្តេចត្រាញ់ លើបញ្ហាគ្រប់គ្រងដីធ្លី ជាពិសេសលោក សូ សុខ ធ្លាប់បានបង្កឲ្យមាន ជម្លោះដីធ្លីយ៉ាងរាលដាល តាមរយៈការចេញប័ណ្ណកម្មសិទ្ធិជាន់លើគ្នា ឬការចេញប័ណ្ណកម្មសិទ្ធិ ឲ្យអ្នកមានលុយ មានអំណាចដោយខុសច្បាប់។ ប្រជាពលរដ្ឋនៅខេត្តព្រះសីហនុ បានទទួលប័ណ្ណកម្មសិទ្ធិ គ្រប់គ្រងដីធ្លីប្រមាណ ៣០ភាគរយប៉ុណ្ណោះ ហើយប្រហែល ៧០ភាគផ្សេងទៀត គ្មានលទ្ធភាពរកលុយទៅធ្វើ ប័ណ្ណកម្មសិទ្ធិដីធ្លីនោះទេ ព្រោះការធ្វើប័ណ្ណកម្មសិទ្ធិត្រូវចំណាយលុយ ច្រើនសន្ធឹកសន្ធាប់ ។

ប្រជាពលរដ្ឋបានលួចបង្ហើបទៀតថា បើចង់បានប័ណ្ណកម្មសិទ្ធិ យកមកប្រើប្រាស់ប្រជាពលរដ្ឋ ទៅទំនាក់ទំនងជាមួយមន្ត្រីជំនាញ សុរិយាដីរបស់លោក សូ សុខ ហើយមានការតម្រូវ ឲ្យប្រជាពលរដ្ឋបង់លុយ ចាប់ពី ១២០០ដុល្លារ រហូតដល់រាប់ម៉ឺនដុល្លារ អាស្រ័យទៅតាមទំហំដីតូចឬធំ ហើយតម្លៃសេវាដ៏ខ្ពស់កប់ពពកបែបនេះ សម្រាប់តែដីនៅក្នុងក្រុង និងដីតាមទីប្រជុំជនស្រុក។ ក្នុងមន្ទីរសុរិយោដីខេត្តព្រះសីហនុ នាពេលបច្ចុប្បន្ននេះ មានប្រព័ន្ធគ្រប់គ្រងតាមបែប ក្រុមហ៊ុនអាជីវកម្មផ្តាច់មុខមួយ ដោយជ្រកក្រោមស្លាករដ្ឋ ព្រោះថាក្នុងមន្ទីរមួយនេះ មានការចាត់តាំងឲ្យមន្ត្រីចាំគាបជំរិត យកលុយពីប្រជាពលរដ្ឋដែលទៅសុំច្បាប់សាងសង់ ឬទៅសុំធ្វើប័ណ្ណកម្មសិទ្ធិ។

នៅពេលចូលទៅដល់បរិវេណ មន្ទីរសុរិយោដីរបស់លោក សូ សុខ គេសង្កេតឃើញរចនាសម្ព័ន្ធ នៃការិយាធិបតេយ្យ ជាចំហ ហើយមានមន្ត្រីអង្គុយត្រៀបត្រា នៅតាមតុដែលគេរៀបជាជួរ គឺនៅតុណាក៏ត្រូវបង់លុយដែរ ដោយមានមន្ត្រីអង្គុយចាំរាប់លុយ មិនឲ្យបាត់មួយកាក់ មួយសេនណាឡើយ មុនពេលបញ្ជូនឯកសារដែលមានភ្ជាប់លុយ ឲ្យថ្នាក់លើរបស់ពួកគេពិនិត្យ និងសម្រេច។ ការអង្គុយបណ្តាក់គ្នាដូចខ្យង របស់មន្ត្រីក្រោមឱវាទលោក សូ សុខ គឺគេមានបារ៉ែម សម្រាប់កំណត់ឲ្យ ប្រជាពលរដ្ឋបង់លុយ មិនខុសពីក្រុមហ៊ុនឯកជននោះទេ បើមិនទាន់បង់លុយគ្រប់ចំនួន ឯកសារនៅជាប់ទ្រឹងមួយកន្លែង ទៅមុខអត់រួចទេ ហើយកុំរំពឹងថា អាចទទួលបានប័ណ្ណកម្មសិទ្ធិ ឬលិខិតសាងសង់ឲ្យសោះ ប្រសិនបើបង់លុយមិនគ្រប់ ឬមិនចេះឲ្យលុយទៅមន្ត្រីសុរិយោដី ចាយវាយក្រៅផ្លូវការទេនោះ។

ប្រជាពលរដ្ឋដែលធ្លាប់ធ្វើប័ណ្ណកម្មសិទ្ធិបានបង្ហើបឲ្យដឹងថា តាមតម្លៃហាងឆេងផ្ទេរសិទ្ធិ ទិញលក់ដីតម្លៃទាបបំផុតគឺត្រឹម ១២០០ដុល្លារ រហូតដល់រាប់ម៉ឺនដុល្លារ ហើយតម្លៃធ្វើប័ណ្ណកម្មសិទ្ធិ ស្របច្បាប់មានចាប់ពី ៣ពាន់ដុល្លារ ដល់រាប់ម៉ឺនដុល្លារ ហើយតម្លៃបែបនេះ គេគិតតែសេវាដីធ្លីទាំងឡាយណា ដែលមានលក្ខណៈស្របច្បាប់ គ្មានការប្តឹងផ្តល់តាមផ្លូវតុលាការ។ ចំពោះការធ្វើប័ណ្ណកម្មសិទ្ធិ លើដីមិនស្របច្បាប់ ដូចជាប័ណ្ណកម្មសិទ្ធិ សម្រាប់ដីលើចំណីអូរ ចំណីសមុទ្រ ដីព្រៃលិចទឹកជាដើម គឺបង់ក្នុងកម្រិតខ្ពស់ ១គុណនឹង៥ឯណោះ បើទោះបីជាតំបន់ខ្លះ រដ្ឋបានហាមឃាត់មិនឲ្យ មានការធ្វើកម្មសិទ្ធិឲ្យឯកជន ក៏លោក សូ សុខ អាចសម្របសម្រួលធ្វើបានទាំងអស់ ឲ្យតែមានលុយបង់ជូនគាត់ ហើយកន្លងមករាជរដ្ឋាភិបាល ក៏ធ្លាប់បានមោឃៈចោលនូវប័ណ្ណកម្មសិទ្ធិដីធ្លី ដែលចេញដោយលោក សូ សុខ ផងដែរ។

ដូចជាតំបន់ដីព្រៃលិចទឹក ក្នុងសហគមន៍នេសាទ នៃស្រុកស្ទឹងហាវ គេសង្កេតឃើញលោក សូ សុខ ចេញប័ណ្ណកម្មសិទ្ធិ ឲ្យឈ្មួញរាប់សិបហិកតា ដោយបំពានព្រះរាជក្រឹត្យ ហើយប្រមូលបានលុយរាប់ម៉ឺនដុល្លារ យកទៅដាក់ចូលក្នុងហិបខ្មៅ របស់លោក សូ សុខ ពោលគឺឲ្យតែមានលុយ អាចធ្វើអ្វីៗតាមតែអំពើចិត្ត ។ ដោយឡែក ប្រជាពលរដ្ឋក្រីក្រ ដែលគ្មានលុយបង់ ឲ្យមន្ត្រីសុរិយោដីរបស់លោក សូ សុខ គ្មានឱកាសទទួលបាន ប័ណ្ណកម្មសិទ្ធិដីធ្លីស្របច្បាប់នោះទេ ហើយការក្រាញអំណាចដុះស្លែ និងអំពើពុករលួយមានលក្ខណៈ ជាប្រព័ន្ធដែលលោក សូ សុខ កំពុងប្រព្រឹត្តនាពេលបច្ចុប្បន្ននេះ បានធ្វើឲ្យប្រជាពលរដ្ឋ នៅទូទាំងខេត្តព្រះសីហនុ ក្តៅក្រហាយ នាំឲ្យគណបក្សប្រជាជនកម្ពុជា ខាតបង់សំឡេងឆ្នោត យ៉ាងច្រើនសន្ធឹកសន្ធាប់ ៕