យុវជនខ្មែរនៅតែបន្តការតស៊ូ ក្រោយពីរដ្ឋាភិបាលដោះលែងយុវជន ៤ រូប

បញ្ចូលព័ត៌មានដោយ៖Unknown on Friday, August 30, 2013 0

ចៅក្រមសាលាដំបូងរាជធានីភ្នំពេញ លោក សេង នាង ចេញដីកានៅថ្ងៃទី ២០ ខែសីហា សម្រេចឲ្យដោះលែងជនជាប់ចោទ ៤ នាក់ ដែលជាប់ចោទពីបទញុះញង់ឲ្យមានហិង្សាប្រដាប់អាវុធផ្ដួលរំលំរដ្ឋា ភិបាលឲ្យនៅក្រៅឃុំបណ្ដោះអាសន្ន ។

នៅវេលាម៉ោងប្រមាណ ១១ ព្រឹក ថ្ងៃទី ២០ ខែសីហា នេះ ក្រុមសមត្ថកិច្ចកំពុងរៀបចំសំណុំបែបបទដើម្បីដោះលែងអ្នកទាំង ៤ ពីពន្ធនាគារព្រៃស។

ការសម្រេចដោះលែងនេះ គឺបន្ទាប់ពីមេធាវី និងគ្រួសាររបស់យុវជនទាំងនោះ បានដាក់លិខិតសុំធានាឲ្យនៅក្រៅឃុំបណ្ដោះអាសន្ន កាលពីថ្ងៃទី ១៩ ខែសីហា ឆ្នាំ ២០១៣ ។

បន្ទាប់ពីបានដោះលែងភ្លាម លោក ទត់ ចាន់បញ្ញា បានថ្លែងប្រាប់ក្រុមអ្នកយកព័ត៌មានយ៉ាងខ្លីថា លោក មិនអាចនិយាយអ្វីបានទេនៅពេលនេះ តែលោកបញ្ជាក់ថា លោកមិនបានធ្វើខុសអ្វីឡើយ ។

លោក ទត់ បញ្ហា ៖“អត់អ៊ីគ្រាន់តែសប្បាយចិត្តក្រោយបានដោះលែង ដែលត្រូវបានរួចខ្លួន ។ ប្រហែល ជាថ្ងៃ ហ្នឹងអត់អាចផ្ដល់បទសម្ភាសន៍បាន ដោយសារ មិនទាន់មានអារម្មណ៍ល្អ ។ ខ្ញុំអត់បានធ្វើខុស គ្រាន់តែប៉ុណ្ណឹង” ។

លោក កែវ សាម៉ាឌី អ្នកសេរសេរប្លក់ខ្មែរ និងអ្នកប្រើបណ្ដាញសង្គម Facebook មានវត្តមាននៅក្នុងពិធីដោះលែងយុវជនទាំងនេះ បានប្រាប់អ្នកកាសែតអំពីព្រឹត្តិការណ៍ដែលយុវជនទាំងនេះ បានចែកផ្កាដល់ទាហានខ្មែរនៅទីក្រុងភ្នំពេញ កាលពីពេលកន្លងទៅនេះថា ។

លោក កែវ សាម៉ាឌី ៖“ក្នុងអំឡុងពេលដែលពួកគាត់កំពុងតែពិភាក្សាគ្នា ប្រមូលលុយគ្នា ហៅប៉ៅ រៀងៗ ខ្លួន ។ ស្រាប់តែមាន មនុស្ស មិនស្គាល់មុខផ្សេងដទៃទៀត …បានផ្ដល់ព័ត៌មានមកគាត់ ផ្តល់ព័ត៌មាន មក លោក ទត់ បញ្ហា ហ្នឹងណា ថា គេហ្នឹងជួយឧបត្ថម្ភផ្កា ។ ក៏ប៉ុន្តែឧបត្ដម្ភផ្កាទៅគាត់ ៗមិនបានដឹងរឿង អ៊ីសោះ ។ គាត់ ត្រេកអរ គាត់គិតថា មានសប្បុរសជន គេជួយឧបត្ភម្ភផ្កា ឧបត្ថម្ភអ៊ីទៅឲ្យគាត់ចឹងណា ។ ចឹងគាត់ធ្វើ ដំណើរទៅយកផ្កា ។ នៅពេលគាត់ធ្វើដំណើរទៅយកផ្កានោះ ក៏ស្រាបតែត្រូវបានកងកម្លាំង សមត្ថកិច្ច ហ្នឹងធ្វើការឃាត់ខ្លួន គាត់តែម្ដង ។ នៅក្នុងពេលដែល បញ្ញា ទៅយកផ្កានោះ គាត់គិតថា ទៅយកម្នាក់ ឯងមិន កើតទេ ។ គាត់ហៅ ដា លីន ទៅជាមួយចឹងទៅណា ……ចឹងបានជាប់ទាំង ពីរនាក់តែម្ដងទៅ”។

នាង ធី សុវណ្ណថា ម្ចាស់ទំព័របណ្ដាញសង្គម Facebook មានឈ្មោះ I Love Cambodia Hot News និងជាមិត្តភក្តិ៍របស់ជនជាប់ចោទ បានថ្លែងប្រាប់ក្រុមអ្នកយកព័ត៌មានថា ទង្វើរបស់អាជ្ញាធរ មិនអាចគំរាម ឲ្យក្រុមយុវជនបាក់ស្បាតបានទេ តែវាជម្រុញឲ្យពួកគេកាន់តែមានចិត្តពុះកញ្ជ្រោលឡើងថែមទៀត ដើម្បី ប្រទេសជាតិ ។

នាង ធី សុវណ្ណថា ៖ “យុវជនយើងទាំងអស់ក្រោយពីមានបញ្ហាទាំងនេះហើយ ពួកគាត់អត់បានចុះចាញ់ ទេ រឹតតែធ្វើទឹកចិត្តដែលថាស្នេហាជាតិរបស់ពុះកញ្ជ្រោលឡើង គឺព្រួតដៃគ្នាតស៊ូ ក្លាយជាចង្កឹះមួយបាច់ ដើម្បីប្រទេសជាតិ ទៅថ្ងៃមុខទៀត មានអនាគតរុងរឿង ដោយសារយុវជនទាំងអស់មានសាមគ្គីភាព ។ នៅតែបន្ត ព្រោះថាផ្កាហ្នឹង យើងចែកអត់មានខុសទេ ។ បង្ហាញពីទឹកចិត្តរបស់យើងទាំងអស់គ្នាចង់បាន សន្តិភាព ។ យើងអត់បានធ្វើអ៊ីខុស អត់ប្រើហិង្សាអ្វីទាំងអស់ ។ ផ្កាគឺយើងបង្ហាញថា ពួកយើងទាំងអស់ គ្នាជូនដល់គាត់”។

លោក អម សំអាត មន្ត្រីគ្រប់គ្រងបច្ចេកទេស នៃការិយាល័យសើបង្កេតរបស់អង្គការ លីកាដូ បាន ប្រាប់ ថ្លែងថា លោកមានការសោកស្ដាយចំពោះការចាប់ខ្លួនយុវជនទាំងនេះ បើទោះបីពេលក្រុមយុវជនទាំងនេះ ត្រូវបានគេដោះលែងយ៉ាងណាក៏ដោយ តែនេះគ្រាន់តែជាការដោះលែងជាបណ្ដោះអាសន្នតែប៉ុណ្ណោះ ។

លោក អម សំអាត បានថ្លែងថា៖ “ការដោះលែងនេះ គឺគេកម្រិតសិទ្ធិសេរីភាពរបស់គាត់ ព្រោះការដោះលែងក្រៅឃុំបណ្ដោះអាសន្ន គឺគេដាក់ឲ្យស្ថិតនៅក្រោមការត្រួតពិនិត្យរបស់ប្រព័ន្ធតុលាការ។ អ៊ីចឹង សិទ្ធិសេរីភាពរបស់គាត់ ត្រូវបានកម្រិតដោយតុលាការ” ។

ចៅក្រមនៃសាលាដំបូងរាជធានីភ្នំពេញ បានសម្រេចឃុំខ្លួនយុវជនទាំង ៤ នាក់ នៅក្នុងពន្ធនាគារកាលពីថ្ងៃទី ១៧ ខែសីហា ក្រោមបទចោទថា បានញុះញង់ឲ្យមានហិង្សាប្រដាប់អាវុធផ្ដួលរំលំរដ្ឋាភិបាល ។ យុវជនទាំង ៤ នាក់នោះ មានឈ្មោះ លោក ទត់ ចាន់បញ្ញា, លោក ហ៊ើយ បូរិន, នាង ឡុង លីផេង និងនាង សុខ ដាលីន ៕

ប្រភពឯកសារដើម៖ សារប័ត៌មានព្រៃនគរ

បញ្ជាក់៖ អត្ថបទដែលបានចុះផ្សាយនេះមិនមែនជាការតែងនិពន្ធដោយ Sampann IT ឡើយ ៕