វិភាគ៖ តើការប្តូរបេក្ខភាពនាយករដ្ឋមន្ត្រីរបស់ CPP អាចធ្វើឲ្យបក្សនេះ មានកំណើនអាសនៈវិញទេ?

បញ្ចូលព័ត៌មានដោយ៖Unknown on Thursday, February 27, 2014 0

ក្រោយការរំដោះប្រទេស និងប្រជាពលរដ្ឋពីរបបប្រល័យពូជសាសន៍ ថ្ងៃទី៧ ខែមករា ឆ្នាំ១៩៧៩ លោក ហ៊ុន សែន មានតួនាទីជារដ្ឋមន្ត្រីក្រសួងការបរទេស ហើយចាប់តាំងពីឆ្នាំ១៩៨៥ លោក បានក្លាយជានាយករដ្ឋមន្ត្រីនៃប្រទេសកម្ពុជា និងមានតួនាទីជាអនុប្រធានគណបក្សប្រជាជនកម្ពុជា។

នៅថ្ងៃទី២៣ ខែតុលា ឆ្នាំ១៩៩១ លោកនាយករដ្ឋមន្ត្រី ហ៊ុន សែន ជាតំណាងហត្ថលេខីសំខាន់មួយរូប ក្នុងដំណើរការកិច្ចព្រមព្រៀងសន្តិភាពទីក្រុងប៉ារីស២៣ តុលា ឆ្នាំ១៩៩១ ជាលទ្ធផលនៃកិច្ចព្រមព្រៀងនេះ គឺការបោះឆ្នោតសកល និងដោយសេរីមួយ ដែលបានធ្វើឡើងជាលើកដំបូងនៅកម្ពុជា ឆ្នាំ១៩៩៣។

បើក្រឡេកមើលលទ្ធផលបោះឆ្នោតនៅកម្ពុជា ចាប់តាំងពីអាណត្តិទី១ ឆ្នាំ១៩៩៣មក គណបក្សប្រជាជនកម្ពុជា ទទួលបាន ៥១អាសនៈ អាណត្តិទី២ ឆ្នាំ១៩៩៨ បាន៦៤អាសនៈ អាណត្តិទី៣ ឆ្នាំ២០០៣ បាន៧៣អាសនៈ និងអាណត្តិទី៤ ឆ្នាំ២០០៨ បាន៩០អាសនៈ ដែលបង្ហាញពីការកើនឡើងជាបន្តបន្ទាប់នៃប្រជាប្រិយភាពរបស់បក្សនេះ។ ដោយឡែក សម្រាប់អាណត្តិទី៥ ឆ្នាំ២០១៣វិញ គណបក្សប្រជាជនកម្ពុជា ទទួលបានតែ៦៨អាសនៈប៉ុណ្ណោះ ដែលចំនួននេះ បានធ្លាក់ចុះ២២អាសនៈ បើធៀបនឹងអាណត្តិមុន ខុសពីការរំពឹងទុករបស់គណបក្ស និងលោកនាយករដ្ឋមន្ត្រី ហ៊ុន សែន។

លទ្ធផលនេះ ត្រូវបានអ្នកតាមដានព្រឹត្តិការណ៍សង្គម កត់សម្គាល់ឃើញថា ជាផ្នែកមួយ ដែលជំរុញឲ្យប្រមុខរដ្ឋាភិបាល ដឹកនាំដោយគណបក្សប្រជាជនកម្ពុជា គឺលោក ហ៊ុន សែន ចាប់ផ្តើមបន្ទន់ឥរិយាបថ រហូតដល់ប្រកាសទទួលយកសំណើកែទម្រង់ស្ថាប័នជាតិធំៗមួយចំនួន ដែលរងការរិះគន់ដឹកនាំគ្មានតម្លាភាព និងមានអំពើពុករលួយជាដើម។

អ្វីដែលអ្នកតាមដានសង្គម កំពុងតែយកចិត្តទុកដាក់ គឺថាតាមឃោសនស័ព្ទ ក្នុងយុទ្ធនាការឃោសនាបោះឆ្នោត ដែលគណបក្សប្រជាជនកម្ពុជា បានប្រើសម្រាប់ការបោះឆ្នោតអាណត្តិទី៥នេះ គឺ «បើស្រឡាញ់ បើអាណិត បើពេញចិត្ត បើជឿទុកចិត្ត សម្តេច ហ៊ុន សែន សូមបោះឆ្នោតជូនគណបក្សប្រជាជកម្ពុជា»។

នាយកប្រតិបត្តិអង្គការនិចហ្វិច លោក ហង្ស ពុទ្ធា និងជាអ្នកតាមដានបញ្ហាសង្គម យល់ថា ការធ្លាក់ប្រជាប្រិយភាពរបស់គណបក្សប្រជាជនកម្ពុជាក្នុងអាណត្តិទី៥នេះ លោកនាយករដ្ឋមន្រ្តី ហ៊ុន សែន គឺជាតួអង្គសំខាន់បំផុតក្នុងការដឹកនាំដំណើរការបក្ស ដោយសារការផ្តល់សារនយោបាយជូនដល់ប្រជាពលរដ្ឋ មុននិងក្រោយការបោះឆ្នោត គឺភាគច្រើនប្រែជាមានលក្ខណៈបុគ្គលិក ជាជាងតំណាងបក្សទាំងមូល។

ជាការកត់សម្គាល់ ក្រោយការបោះឆ្នោតអាណត្តិទី៥នេះ បាតុករគណបក្សសង្រ្គោះជាតិរាប់ម៉ឺននាក់ បានហែក្បួនមហាបាតុកម្មតាមដងវិថីក្នុងរាជធានីភ្នំពេញ និងវេទិកាជួបជុំ តាមខេត្ត ទាមទារការស៊ើបអង្កេតលទ្ធផលឆ្នោត ថ្ងៃទី២៨ ខែកក្កដា និងការបោះឆ្នោតឡើងវិញ ដោយក្នុងនោះ ក៏មានជាសារនយោបាយ ទាមទារដោយស្រែកចំៗទម្លាក់ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន ពីតំណែងផងដែរ។

ករណីនេះ លោក ហង្ស ពុទ្ធា យល់ថា បើនៅតែមិនមានកំណែទម្រង់ទេនោះ ប្រជាប្រិយភាពបក្សនេះ នឹងកាន់តែដុនដាប សម្រាប់ការបោះឆ្នោតថ្ងៃខាងមុខ «តួអង្គរបស់គណបក្សប្រជាជន ហាក់ដូចជាត្រូវបានប្រឈមរួចទៅ ទៅនឹងបញ្ហាទាំងឡាយ ដូចជាក្រុមបាតុករ បានលើកឡើងអញ្ចឹង បើសិនជា គណបក្សប្រជាជនកម្ពុជា រក្សាទុកនូវបេក្ខជននាយករដ្ឋមន្រ្តី (ហ៊ុន សែន) ដដែល យើងអាចមើលឃើញថា ចំនួនអ្នកចូលរួមក្នុងបាតុកម្ម ច្បាស់ជាមិនបោះឆ្នោត ឲ្យគណបក្សប្រជាជនកម្ពុជាទេ។»

ជារឿយៗ លោកនាយករដ្ឋមន្ត្រី អាយុ៦៣ឆ្នាំ តែងតែប្រកាសថា លោកនឹងកាន់តំណែងជានាយករដ្ឋមន្ត្រី រហូតដល់អាយុ៧៤ឆ្នាំ គឺមានន័យថា ការបោះឆ្នោតអាណត្តិទី៦ ឆ្នាំ២០១៨ លោកនឹងធ្វើជានាយករដ្ឋមន្ត្រី ៥ឆ្នាំទៀត រហូតដល់ឆ្នាំ២០២៣។

សម្រាប់អ្នកវិភាគ នយោបាយ លោកបណ្ឌិត សុខ ទូច គិតថា នាមលោកនាយករដ្ឋមន្ត្រី ហ៊ុន សែន ជាសំបកក្រៅ និងជ្រុងមួយនៃប្រជាប្រិយភាពបក្សនេះ តែបញ្ហាចោទសំខាន់ គឺលទ្ធផលនៃការដឹកនាំកន្លងមក ដែលមិនឆ្លើយតបទៅនឹងបញ្ហាសង្គមដូចជា រឿងដីធ្លី សិទ្ធិការងារ និងបញ្ហាសេដ្ឋកិច្ច គួបផ្សំនឹងទម្លាប់ចាស់ ដែលបក្សនេះ ព្យាយាមជីកកកាយកេរ្តិ៍ស្នាដៃអតីតកាល បង្ហាញដល់ម្ចាស់ឆ្នោតគ្រប់រដូវកាលបោះឆ្នោត ដែលគ្មានប្រសិទ្ធិចំពោះយុវជនជំនាន់ក្រោយ។

លោក សុខ ទូច យល់ថា នាមលោកនាយករដ្ឋមន្ត្រី ហ៊ុន សែន តំណាងគណបក្សប្រជាជនកម្ពុជា នឹងកាន់តែបង្កើនប្រជាប្រិយភាព បើសិនជាលោកជាវីរជន អាចផ្តល់ដំណោះស្រាយដល់ប្រជាពលរដ្ឋ មិនមែនគ្រាន់តែជាបុគ្គល ដែលពលរដ្ឋរងគ្រោះគ្រាន់តែគិតដល់ឈ្មោះភ្លាម ក៏នឹកដល់ភាពបរាជ័យនោះទេ «បើបុគ្គលហ្នឹង (ហ៊ុន សែន) គាត់ជាបុគ្គលអធិរាជ បុគ្គលអច្ឆរិយ គាត់ដោះស្រាយបញ្ហាចេញគាត់ធ្វើអ្វីបានជោគជ័យ ងារនឹងរឹតតែធ្វើឲ្យគណបក្សប្រជាជន កាន់តែខ្លាំង ប៉ុន្តែ បើសិនជាដាក់ទៅបញ្ហាមួយមិនដោះស្រាយ បញ្ហាមួយមិនដោះស្រាយ បញ្ហាមួយមិនដោះស្រាយ ឧបមាថា ចូលមើលព្រៃ ព្រៃបាត់អស់ ចូលមើលព្រៃ ព្រៃខ្ទេចអស់ សូម្បីតែលោកជាមនុស្ស ប្រថុតជន ក៏លោក ធុញថប់រឿងអ្វីដែលគ្មានចម្លើយហ្នឹងដែរ។»

ក្រោយការបោះឆ្នោតអាណត្តិទី៤ វិទ្យាសា្ថនសាធារណរដ្ឋអន្តរជាតិ IRI បានចេញរបាយការណ៍ស្ទង់មតិ ដោយរកឃើញថា កម្ពុជា ក្រោមការដឹកនាំដោយគណបក្សប្រជាជនកម្ពុជា ដើរលើផ្លូវត្រូវ ៨២% ខណៈទទួលបាន ៩០អាសនៈ ដែលគ្រានោះ លោកនាយករដ្ឋមន្ត្រី ហ៊ុន សែន បានប្រកាសទទួលស្គាល់ការស្ទង់មតិនោះ។ ប៉ុន្តែ ភាគរយផ្លូវត្រូវនេះ បានធ្លាក់ចុះមកត្រឹម ៥៥% ក្រោយការបោះឆ្នោតឆ្នាំ២០១៣ ខណៈគណបក្សនេះទទួលបានតែ៦៨អាសនៈ តែប៉ុណ្ណោះ ដែលនាំឲ្យការស្ទង់មតិនេះ រងការរិះគន់ពីមន្ត្រី បក្សកាន់អំណាចនេះ ថាមិនបានឆ្លុះបញ្ចាំងពីតថភាពកម្ពុជាទាំងស្រុងនោះទេ។

ទឡ្ហីករណ៍ នេះ ត្រូវបានលោក លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកតាមដានព្រឹត្តការណ៍សង្គម បកស្រាយថា បណ្តាលមកពីរយៈពេល ៥ឆ្នាំនៃការដឹកនាំ ក្រោយពីទទួលបានសំឡេងគាំទ្រច្រើន លោកនាយករដ្ឋមន្ត្រី ហ៊ុន សែន ផ្ទាល់ ក៏ដូចជាមន្ត្រីជាន់ខ្ពស់បក្ស បង្អួតពីឥទ្ធិពលខ្លួនក្នុងឆាកនយោបាយ ដែលគ្មានអ្នកហ៊ានបំពានបាន ភ្លេចគិតពីប្រជាពលរដ្ឋជាម្ចាស់ឆ្នោត ផ្ទុយទៅវិញ បែរបង្កនូវបញ្ហាបន្ថែម។

យ៉ាងណាក៏ដោយ លោក អ៊ូ វីរៈ វិភាគថា ការពិចារណាប្តូរបេក្ខភាពនាយករដ្ឋមន្ត្រី លោក ហ៊ុន សែន ពីគណបក្សប្រជាជនកម្ពុជាទៅថ្ងៃខាងមុខ អាចនាំនូវផលវិបាក និងបង្កជម្លោះផ្ទៃក្នុងបក្ស ដោយសារតែការប្រកាន់បក្ខពួក និងការច្រណែនគ្នា «បើមើលចំនុចហ្នឹង លោក ហ៊ុន សែន ច្បាស់ជាចង់ឲ្យកូនគាត់បន្តវេន ប៉ុន្តែ មន្រ្តីជាច្រើនក្នុងគណបក្សប្រជាជនកម្ពជា ដូចជា អ្នកដែលធ្វើការយូរគាត់ប្រហែលជាអត់សូវសប្បាយចិត្ត វាអាចធ្វើឲ្យប៉ះពាល់ទៅលើ ទឹកចិត្តរបស់ សមាជិកគាត់ដែរ អាហ្នឹងក៏ជាបញ្ហាមួយ។»

អំឡុងយុទ្ធនាឃោសនា មុនថ្ងៃបោះឆ្នោត លោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា ធ្លាប់បានអះអាងថា បើគណបក្សខ្លួនទទួលបានការគាំទ្រ តិចជាង៦០ភាគរយនោះ លោក នឹងចុះចេញពីតំណែង។ ប៉ុន្តែ ក្រោយការប្រកាសលទ្ធផលឆ្នោត ដែលរកឃើញថា គណបក្សប្រជាជនកម្ពុជា ទទួលបានតែ៦៨អាសនៈ អ្នកគាំទ្រគណបក្សប្រឆាំង បានប្រកាសទាមទារភា្លមៗឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែងតាមការសន្យា ដោយចោទថា គណបក្សនេះ លួចបន្លំសន្លឹកឆ្នោត បង្កភាពមិនប្រក្រតីលើលទ្ធផលឆ្នោត។

កន្លងទៅ លោកនាយករដ្ឋមន្ត្រី ហ៊ុន សែន បានរំលឹកពីសំណួរដែលលោកទទួលបានពីបុគ្គលម្នាក់ ទាក់ទងនឹងការតែងតាំងកូនប្រុសច្បងរបស់លោកម្នាក់ គឺលោក ហ៊ុន ម៉ាណែត ឲ្យធ្វើជាប្រធានគណបក្សប្រជាជនកម្ពុជា(CPP) នៅពេលលោកជា ស៊ីម ដែលបច្ចុប្បន្នជាប្រធានគណបក្សប្រជាជនកម្ពុជា ទទួលមរណភាព។ ក្នុងការបោះឆ្នោតអាណត្តិទី៥នេះ កូនប្រុសម្នាក់ទៀតរបស់លោកនាយករដ្ឋមន្ត្រី គឺលោក ហ៊ុន ម៉ានី ត្រូវបានដាក់ឲ្យជាប់ឆ្នោតជាតំណាងរាស្ត្រខេត្តកំពង់ស្ពឺ។

រហូតមកដល់ពេលនេះ លោក ហ៊ុន សែន មិនទាន់ប្រកាសថាតើអាចនឹ ងមានការដាក់កូនប្រុស របស់លោកធ្វើជាបេក្ខភាពនាយ ករដ្ឋមន្ត្រីសម្រាប់អាណត្តិក្រោយៗទៀតនៅឡើយទេ៕

ប្រពព័ត៌មាន៖ សារព័ត៌មានខ្មែរស្ថាបនា