សាលាក្ដីខ្មែរក្រហមគ្រោងបញ្ចប់សំណុំរឿងលេខ០០២វគ្គ១ត្រឹមថ្ងៃ៣១តុលា

បញ្ចូលព័ត៌មានដោយ៖Unknown on Tuesday, October 15, 2013 0

បន្ទាប់ពីបានដោះស្រាយបញ្ហាខ្វះថវិការួចមក សាលាក្ដីខ្មែរក្រហមគ្រោងចាប់ផ្ដើមធ្វើសវនាការជម្រះក្ដីជាបន្ត នៅថ្ងៃទី១៦ ខែតុលា ឆ្នាំ២០១៣ នេះ។ សវនាការនេះ គឺជាការបញ្ចប់ការពិភាក្សាដេញដោលលើសំណុំរឿងលេខ០០២ វគ្គទី១ ដែលមានជនជាប់ចោទ ២រូប គឺ នួន ជា និង ខៀវ សំផន។

ប្រធានផ្នែកកិច្ចការសាធារណៈនៃសាលាក្ដីខ្មែរក្រហម លោក ឌឹម សុវណ្ណារុំ ថ្លែងឱ្យដឹងនៅក្នុងសន្និសីទសារព័ត៌មាន នៅរសៀលថ្ងៃទី១៤ តុលា ថា អង្គជំនុំជម្រះសាលាដំបូងនឹងបន្តសវនាការរបស់ខ្លួនតាមការគ្រោងទុក ដើម្បីបិទបញ្ចប់សំណុំរឿងលេខ០០២ វគ្គទី១ នៅត្រឹមថ្ងៃទី៣១ ខែតុលា ឆ្នាំ២០១៣។

តាមពេលវេលាដែលគ្រោងទុកសម្រាប់ធ្វើសវនាការបញ្ចប់សំណុំរឿងលេខ០០២ វគ្គទី១ នេះ មានរយៈពេល ១០ថ្ងៃ គឺចាប់ពីថ្ងៃទី១៦ ដល់ថ្ងៃទី៣១ ខែតុលា ហើយអង្គជំនុំជម្រះនឹងផ្ដល់ឱកាសឱ្យមេធាវីនាំមុខដើមបណ្ដឹងរដ្ឋប្បវេណី ធ្វើសេចក្ដីសន្និដ្ឋានមុនគេទាក់ទងនឹងការទាមទារសំណង។

លោក ឌឹម សុវណ្ណារុំ ថ្លែងថា មេធាវីនាំមុខដែលតំណាងឱ្យដើមបណ្ដឹងរដ្ឋប្បវេណីចំនួន ៣.៨៦៥នាក់ រហូតមកដល់ពេលនេះ បានត្រៀមគម្រោងទាមទារសំណងរបស់ខ្លួនរួចហើយ។ បន្ទាប់មក ពីថ្ងៃទី១៦ និង ១៨ តុលា ជាកាលវិភាគសម្រាប់សហព្រះរាជអាជ្ញា ធ្វើសេចក្ដីថ្លែងការណ៍សង្ខេបរបស់ខ្លួនលើភស្តុតាងដែលចោទប្រកាន់ជនជាប់ចោទ៖ «សហព្រះរាជអាជ្ញាកន្លងមក បានលើកឡើងហើយជុំវិញបទចោទប្រកាន់សំណុំរឿង ០០២ ភាគទី១ ហ្នឹង រួមមាន ការបង្ខំធ្វើការហួសកម្លាំង ការដាក់ជាទាសករ ការសម្លាប់ប្រជាជន ការធ្វើទុក្ខបុកម្នេញលើសាសនា ការរៀបការដោយបង្ខំ ឧក្រិដ្ឋកម្មនានានៅមន្ទីរសន្តិសុខ និងអំពើប្រល័យពូជសាសន៍លើក្រុមជាតិពន្ធផ្សេងៗ ដែលជាបទសង្ខេប ជាបទចោទក្នុងសំណុំរឿង០០២ នៃដំណាក់កាលទី១ ហើយពាក់ព័ន្ធទៅនឹងការជម្លៀស ហើយចុងក្រោយក៏មានការពាក់ព័ន្ធទៅនឹងការសម្លាប់ទាហាន លន់ នល់ នៅទួលពោធិ៍ជ្រៃ ក្នុងខេត្តពោធិ៍សាត់ ផងដែរ»។

នៅថ្ងៃទី២១ តុលា គឺជាថ្ងៃដែលសហព្រះរាជអាជ្ញាត្រូវស្នើសុំដាក់ទោសជនជាប់ចោទ។ បន្ទាប់ពីនេះ គឺនៅថ្ងៃទី២២ ដល់ថ្ងៃទី២៨ មេធាវីរបស់ជនជាប់ចោទទាំងពីររូប ធ្វើសេចក្ដីថ្លែងបញ្ចប់ទាក់ទងនឹងការការពារកូនក្ដីខ្លួន គឺជនជាប់ចោទ នួន ជា និង ខៀវ សំផន។

នៅថ្ងៃទី៣០ និង ៣១ តុលា គឺជាថ្ងៃដែលភាគីដើមចោទ និងចុងចោទ ធ្វើសេចក្ដីសន្និដ្ឋានឆ្លើយតបគ្នាទៅវិញទៅមកចុងក្រោយ។

មន្ត្រីទំនាក់ទំនងផ្នែកច្បាប់ គឺលោក ឡាស អូលសិន (Lars Olsen) បញ្ជាក់ថា រយៈពេល ១០ថ្ងៃនៃការធ្វើសេចក្ដីសន្និដ្ឋានបញ្ចប់នេះ គឺជាឱកាសចុងក្រោយសម្រាប់ភាគីសហព្រះរាជអាជ្ញាបង្ហាញភស្តុតាង និងស្នើសុំការផ្ដន្ទាទោសជនជាប់ចោទ ហើយដើមបណ្ដឹងរដ្ឋប្បវេណីទាមទារសំណង និងភាគីជនជាប់ចោទថ្លែងដោះបន្ទុកការចោទប្រកាន់។ ក្រោយការបញ្ចប់សេចក្ដីសន្និដ្ឋានរបស់ភាគីទាំងអស់ អង្គជំនុំជម្រះនឹងយកពេលវេលាសរសេរសាលក្រម ដែលរំពឹងថានឹងអាចចេញនៅដើមឆ្នាំ២០១៤។

ទាក់ទងនឹងបញ្ហាថវិកាវិញ ទាំងលោក ឌឹម សុវណ្ណារុំ និងលោក ឡាស អូលសិន ឱ្យដឹងថា មិនមានបញ្ហាទេសម្រាប់ដំណើរការសាលាក្ដីរហូតដល់ចុងឆ្នាំ២០១៣។ ដោយឡែក ថវិកាឆ្នាំ២០១៤ និង ២០១៥ ផ្នែករដ្ឋបាលសាលាក្ដីកំពុងធ្វើគម្រោង ហើយនឹងអាចដាក់ជូនប្រទេសម្ចាស់ជំនួយនៅខែវិច្ឆិកា ខាងមុខ។ ទន្ទឹមគ្នានេះ សាលាក្ដីកំពុងកាត់បុគ្គលិករបស់ខ្លួន ១០% ជាបន្តបន្ទាប់តាមការតម្រូវរបស់ផ្នែករដ្ឋបាល។

ដោយឡែក ការជំនុំជម្រះសំណុំរឿង ០០២ វគ្គទី២ លោក ឌឹម សុវណ្ណារុំ ថ្លែងថា នៅមិនទាន់មានការកំណត់ពេលវេលាជាក់លាក់ណាមួយនៅឡើយទេ ដោយផ្នែករដ្ឋបាលកំពុងរៀបចំបង្កើតក្រុមប្រឹក្សាជំនុំជម្រះថ្មីមួយទៀត តាមការបង្គាប់របស់តុលាការកំពូលសម្រាប់វគ្គទី២ នេះ៖ «ហេតុផលដែលតុលាការកំពូលបង្គាប់បញ្ជាឱ្យបង្កើតក្រុមប្រឹក្សាជំនុំជម្រះទី២ គឺក្នុងគោលបំណងដើម្បីការពិត និងយុត្តិធម៌ ហើយជាពិសេស ឱ្យពេលវេលានៃការជំនុំជម្រះនោះអាចដំណើរការទៅមុខមិនមានការរង់ចាំ។ អ៊ីចឹង ដើម្បីឱ្យសំណុំរឿង០០២/០២ អាចដើរទៅមុខបាន គឺមានតែការទាមទារឱ្យបង្កើតក្រុមប្រឹក្សាជំនុំជម្រះទី២ ស្ថិតនៅក្នុងសេចក្ដីសម្រេចរបស់តុលាការកំពូល ក្នុងហេតុផលថា ឱ្យតុលាការដំណើរការទៅមុខឱ្យបានលឿន និងឆាប់រហ័ស ហើយស្របពេលដែលនឹងសុខភាពជនជាប់ចោទផងដែរ»។

រីឯសហព្រះរាជអាជ្ញាអន្តរជាតិវិញ បន្ទាប់ពីសហព្រះរាជអាជ្ញា អេនឌ្រូ ខេលី (Andrew Cayley) លាឈប់ទៅ សហព្រះរាជអាជ្ញាបម្រុង លោក នីកូឡាស គូមយ៉ាន (Nicholas Koumjian) នឹងចូលមកបន្តការងារនៅក្នុងសវនាការបិទបញ្ចប់សំណុំរឿង ០០២ វគ្គទី១ នៅថ្ងៃទី១៦ តុលា ខាងមុខនេះ បន្ទាប់ពីការសច្ចាប្រណិធាននៅឧត្ដមក្រុមប្រឹក្សានៃអង្គចៅក្រមរួច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

ប្រភពព័ត៌មាន៖ វិទ្យុអាស៊ីសេរី

បញ្ជាក់៖រាល់អត្ថបទ និង រូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann ITឡើយ ការចំលងចែកចាយផ្សព្វផ្សាយបន្ត គឺជាការទទួលខុសត្រូវរបស់សាម៉ីជន...សូមអរគុណ!!!!