ក្រុមហ៊ុនកូកា-កូឡាកម្ពុជាបន្តឧបត្ថម្ភគម្រោងទឹកស្អាតជូនដល់សហគមន៍កម្ពុជា

បញ្ចូលព័ត៌មានដោយ៖Unknown on Saturday, October 19, 2013 0

ខេត្តកំពង់ឆ្នាំង ៖ នៅក្នុងឆ្នាំ២០១៣នេះ ក្រុមហ៊ុនភេសជ្ជៈកម្ពុជា កូកា-កូឡា បានបន្តឧបត្ថម្ភផ្នែកគម្រោងទឹកស្អាតជូនដល់សហគមន៍នៅកម្ពុជា។ គម្រោងនេះគឺផ្តល់អណ្តូងទឹកស្អាត ជាប្រភេទអណ្តូងស្នប់ចំនួន២៥អណ្តូង និងធុងចំរោះទឹកស្អាតចំនួន៤០០ ជូនដល់ប្រជាពលរដ្ឋចំនួន៩ភូមិ ស្មើនឹង៤៥០គ្រួសារ ក្នុងឃុំពានី ស្រុកកំពង់ត្រឡាច ខេត្តកំពង់ឆ្នាំង ហើយដែលពិធីប្រគល់និងទទួលនេះ ត្រូវបានរៀបចំធ្វើឡើងនាព្រឹកថ្ងៃទី១៨ ខែតុលា ឆ្នាំ២០១៣ នៅបរិវេនសាលាឃុំពានី ។

ការផ្តល់អណ្តូងទឹកស្អាត និងធុងចំរោះទឹកស្អាតនេះ គឺជាផ្នែកមួយនៃកម្មវិធីគម្រោងទឹកស្អាត និងអនាម័យដល់សហគមន៍ ដែលបានអនុវត្តន៍ចាប់តាំងពីឆ្នាំ២០១០មកទៅលើសហគមន៍ចំនួន៣ នៅក្នុងប្រទេសកម្ពុជា ដោយសមាគមនារីកម្ពុជាដើម្បីសន្តិភាពនិងការអភិវឌ្ឍន៍ ក្រោមការជួយឧបត្ថម្ភ គាំទ្រផ្នែកថវិកាជាដៃគូ ពីក្រុមហ៊ុនភេសជ្ជៈកម្ពុជា កូកា-កូឡា។ មានប្រជាជនជាង៩.០០០នាក់ បានទទួលអត្ថប្រយោជន៍ដោយផ្ទាល់ និងដោយប្រយោលជាច្រើនទៀតពីកម្មវិធីនេះ ចាប់តាំងពីឆ្នាំ២០១០មក។

លោកស្រី មាច សុធារី អគ្គលេខាធិកាសមាគមនារីកម្ពុជាដើម្បីសន្តិភាព និងអភិវឌ្ឍន៍ បានឲ្យដឹងថា គម្រោងផ្គត់ផ្គង់ទឹកស្អាត និងអនាម័យដល់សហគមន៍ គឺជាគម្រោងមួយក្នុងចំណោមគម្រោងចំនួន១៤ របស់សមាគមនារីកម្ពុជាដើម្បីសន្តិភាពនិងអភិវឌ្ឍន៍ ដែលទទួលបានមូលនិធិពីក្រុមហ៊ុនភេសជ្ជៈកម្ពុជាកូកា-កូឡា ដែលបានចាប់ផ្តើមអនុវត្តន៍តាំងពីឆ្នាំ២០០៩មករហូតមកដល់បច្ចុប្បន្ន នៅក្នុងសហគមន៍ចំនួន៣ នៅក្នុងប្រទេសកម្ពុជា។ ដោយឡែកក្នុងឆ្នាំ២០១៣នេះ គម្រោងបានអនុវត្តន៍រយៈពេល១ឆ្នាំ នៅក្នុងឃុំពានី ស្រុកកំពង់ត្រឡាច ដោយចាប់ផ្តើមពីថ្ងៃទី០១ ខែធ្នូ ឆ្នាំ២០១២ ដល់ថ្ងៃទី៣១ ខែតុលា ឆ្នាំ២០១៣ ដែលមានទឹកប្រាក់សរុបចំនួន៧៥.០០០ដុល្លាអាមេរិច។ គម្រោងនេះមានប្រជាពលរដ្ឋ ជាអ្នកទទួលផលផ្ទាល់នៅក្នុងភូមិចំនួន៩ ក្នុងឃុំពានី មានចំនួន៣.០០០នាក់ និង១.០០០នាក់ទៀត បានទទួលផលប្រយោល។ គម្រោងនេះមានគោលដៅធ្វើឲ្យប្រជាពលរដ្ឋក្នុងតំបន់គោលដៅ ទទួលបាននូវទឹកស្អាត បង្កើនឥរិយាបទល្អ អំពីអនាម័យ លើកកម្ពស់ជីវភាព និងសុខុមាលភាពប្រជាពលរដ្ឋឲ្យល្អប្រសើរតាមរយៈការផ្តល់អណ្តូងទឹកស្អាត ធុងចំរោះទឹកស្អាត និងផ្តល់នូវការអប់រំអំពី សុខភាព អនម័យជាដើម។

លោក ផូល ផប់ផ្លើយ៉េ នាយកគ្រប់គ្រងទូទៅនៃក្រុមហ៊ុនភេសជ្ជៈកម្ពុជាកូកា-កូឡា បានលើកឡើងថា ការទទួលបានទឹកស្អាតប្រើប្រាស់ គឺមានសារៈសំខាន់ណាស់ សម្រាប់សុខុមាលភាពរបស់សហគមន៍ និងមានសារៈសំខាន់សម្រាប់ប្រពន្ធ័អេកូ និងជាកត្តាដ៏សំខាន់មិនអាចបំបែកបាន ចំពោះការរីកចម្រើនផ្នែកសេដ្ឋកិច្ច និងសម្រាប់អាជីវកម្ម និងជាចំណុចកណ្តាលនៃដំណើរផលិតកម្ម ។ ក្រុមហ៊ុនកូកា-កូឡា បានចាប់អារម្មណ៍ជាពិសេសក្នុងការការពារប្រភពទឹក ក្នុងតំបន់ ដែលជួយទ្រទ្រង់ដល់សហគមន៍ ដោយសារតែរោងចក្ររបស់យើងស្ថិតក្នុងសហគមន៍ ហើយសហគមន៍ទាំងនោះ ក៏ជាអតិថិជនរបស់យើងផងដែរ ព្រោះបើសហគមន៍រីកចម្រើន អាជីវកម្មរបស់យើងក៏រីកចម្រើនផងដែរ។

លោកស្រី សាន អារុណ រដ្ឋលេខាធិការក្រសួងកិច្ចការនារី បានថ្លែងអំណរគុណយ៉ាងជ្រាលជ្រៅ ចំពោះកិច្ចសហប្រតិបត្តការដ៏ល្អរបស់ក្រុមហ៊ុនកូកាកូឡា ដែលបានធ្វើឲ្យគម្រោងផ្គត់ផ្គង់ទឹកស្អាត និងអនាម័យសហគមន៍ បានដំណើរការប្រកបដោយជោគជ័យ ក្នុងការធ្វើឲ្យសម្រេចនូវទិសដៅរបស់សមាគនារីកម្ពុជា ដើម្បីសន្តិភាពនិងអភិវឌ្ឍន៍ ឆ្នាំ២០១១-២០១៥ គឺ«កសាងគ្រួសារនិងសហគមន៍មានសុភមង្គលពិតប្រាកដ» និងពិតជាបានរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជា ក្នុងការលើកកម្ពស់សុខភាព និងកាត់បន្ថយភាពក្រីក្ររបស់ប្រជាពលរដ្ឋ។

បន្ថែមពីការផលិត និងចែកចាយផលិតផលលំដាប់ពិភពលោក ក្រុមហ៊ុនភេសជ្ជៈកម្ពុជា(កូកា-កូឡា) បានប្រកាសដែរថា នឹងបន្តស្វែងរកឱកាសផ្តល់ត្រឡប់ទៅសង្គមកម្ពុជាវិញតាមរយៈគំនិតផ្តួចផ្តើមផ្សេងៗ ដូចជាកម្មវិធីបរិស្ថាន ជំនួយគ្រោះមហន្តរាយ កម្មវិធីលើកតម្លៃស្ត្រី និងកម្មវិធីអប់រំដោយធ្វើសហការជាមួយដៃគូរបស់ក្រុមហ៊ុន ៕

ប្រភពព័ត៌មាន៖ នគរវត្ត

បញ្ជាក់៖រាល់អត្ថបទ និង រូបភាពដែលបានចុះផ្សាយទាំងនេះមិនមែនជាកម្មសិទ្ធិរបស់ Sampann IT ឡើយ ការចំលងផ្សព្វផ្សាយចែកចាយបន្ត គឺជាការទទទួលខុសត្រូវរបស់សាម៉ីជន...សូមអរគុណ!!!