ដំបូងអ្នកត្រូវសម្រេចចិត្តថាតើអ្នកពិតជាចង់រៀនសរសេរកម្មវិធី និងចង់បានការងារជាអ្នកសរសេរកម្មវិធី ឬ ក៏គ្រាន់តែចង់ សរសេរកម្មវិធីសម្រាប់ការកំសាន្តជាចំណង់ចំណូលចិត្ត ។ នេះជាជំហានសម្រាប់ការជ្រើសរើសមធ្យោបាយក្នុងការរៀន ។ ជ្រើសរើសភាសា

នៅពេលដែលអ្នកមានមូលហេតុដើម្បីរៀនសរសេរកម្មវិធីហើយ បើអ្នកប្រាកដថាអ្នកចង់សរសេរកម្មវិធីហើយ អ្នកគួរ ចាប់ផ្ដើមពីភាសាដូចជា C ព្រោះវាគឺជាភាសាដែលពេញនិយ មសម្រាប់ការរៀន និង ប្រើក្នុងពាណិជ្ជកម្ម ។ មានឯកសារ បង្រៀនជាច្រើនពាក់ព័ន្ធនឹងភាសា C នេះ ។ C ពិបាកក្នុងការរៀន ប៉ុន្តែអ្នកនឹងមើលឃើញប្រយោជន៍វានៅពេលក្រោយ ។ អ្នកគួរ រៀនតែមួយភាសាសិនបានហើយសម្រាប់ការចាប់ផ្ដើមរៀនមូលដ្ឋានគ្រឹះនៃភាសាដំបូង ។ វាប្រហែលជាប្រសើរនៅក្នុងការ ចេះប្រសប់លើភាសាមួយប្រសើរជាងចេះលំៗលើភាសាជាច្រើន បើអ្នកចេះភាសាមួយច្បាស់ហើយវានឹងជួយអ្នកឱ្យរៀនភាសា ផ្សេងទៀតបានងាយស្រួល ។

បើអ្នកមិនចង់រៀនភាសា C ទេអ្នកប្រហែ ជាអាចចាប់អារម្មណ៍លើ៖

C# - ជាភាសាថ្មី និងពេញនិយមដែលយកភាសា C ធ្វើជាមូលដ្ឋាន ប៉ុន្តែមានលក្ខណៈពិសេសៗផ្សេងទៀតដែលធ្វើឱ្យវាងាយស្រួលប្រើ ។

Pascal - ជាភាសាដែលពេញនិយមនិងស្រួលរៀនជាង C

C++ - ជាភាសាដែលយកភាសា C ធ្វើជាមូលដ្ឋាន ប៉ុន្តែមានលក្ខណៈបន្ថែមជ្រៅជ្រះជាង C ។ វាប្រហែលជាប្រសើរជាងបើអ្នករៀន C ជាមុន ។

Java - ជាភាសាដែលពេញនិយមសម្រាប់ពាណិជ្ជកម្ម និង ការរៀន ប៉ុន្តែមិនបង្រៀនអ្នកឱ្យចេះពីទស្សនៈទានមួយចំនួនដូចភាសា C និង C# នោះទេ ។

បើសិនអ្នករៀនសរសេរកម្មវិធីដើម្បីកំសាន្ត អ្នកអាចជ្រើសរើសភាសា Visual Basic ព្រោះវាងាយស្រួលប្រើ ហើយអាចបង្កើតកម្មវិធីបានភ្លាមៗ

ក្រៅពី Visual Basic អ្នកអាចជ្រើសរើស៖

Delphi - ជាភាសាដែលពិបាកជាង Visual Basic ប៉ុន្តែមានបង្រៀននូវចំនុចដែលជាទស្សនៈទានក្នុងការសរសេរកម្មវិធី។
Scripting Languages(Python, Perl) - ងាយក្នុងការសរសេរជាងភាសា Compiled ប៉ុន្តែមានពេលខ្លះក៏ពុំអាចធ្វើការងារបានល្អដូចភាសា Compiledទេ។

គិតថារៀនយ៉ាងដូចម្ដេច

អ្នកដែលចង់សរសេរកម្មវិធីពិតប្រាកដគួរតែរៀនវគ្គបណ្ដុះបណ្ដាលនៅមហាវិទ្យាល័យ ឬ សាកលវិទ្យាល័យនានា ។ អ្នកនឹងខិតខំប្រឹងប្រែងនៅពេលដែលអ្នកចំណាយលុយក្នុងការ បង់ថ្លៃសិក្សា ។ អ្នកក៏នឹងបានរៀនពីចំណេះគ្រប់យ៉ាងដែលអ្នកត្រូវចេះ ដោយមិនមាន ចន្លោះប្រហោងកន្លែងណា

ឡើយ ។ តែបើអ្នកគ្រាន់តែចង់សរសេរកម្មវិធី សម្រាប់កំសាន្ត លេងទេ អ្នកគួររកសៀវភៅ និង ឯកសារបង្រៀនផ្សេងៗនៅលើបណ្ដាញ អ៊ីនធើណែត ។

អនុសាសន៍

អ្នកនឹងគិតថាសរសេរកម្មវិធីជារឿងលំបាកនៅពេលចាប់ផ្ដើមដំបូង ប៉ុន្តែវានឹងក្លាយជាងាយស្រួលនៅពេលក្រោយ ។ អ្នកមិនគួរឈប់នៅកណ្ដាលទីដោយគិតថាវាលំបាកសម្រាប់អ្នកនោះទេ ត្រូវគិតថាការតស៊ូព្យាយាមគង់បានសម្រេច ។ ការសរសេរកម្មវិធីជាការងារដែលហុចផលដ៏មានប្រយោជន៍ និងស័ក្ដិសមនឹងការខិតខំប្រឹងប្រែងរបស់អ្នក ។ សំណាងល្អ!

តើធ្វើយ៉ាងណាដើម្បីក្លាយខ្លួនជាអ្នកសរសេរកម្មវិធី‹ល្អ›ម្នាក់?

លំនាំដើម

យើងទាំងអស់គ្នាសុទ្ធតែចង់ក្លាយខ្លួនជាអ្នកសរសេរកម្មវិធីដ៏ល្អម្នាក់ ប៉ុន្តែដើម្បីទទួលបានងារនេះ អ្នកត្រូវដឹងថាអ្នកត្រូវយល់ដឹងពីអ្វីខ្លះ? ខាងក្រោមនេះជាមាគ៌ាដើម្បីក្លាយខ្លួនជាអ្នកសរសេរកម្មវិធីដ៏ល្អ៖

ដឹងថាត្រូវដោះស្រាយបញ្ហារបៀបណា

ជាអ្នកសរសេរកម្មវិធី អ្នកនឹងធ្វើការជាមួយការដោះស្រាយបញ្ហានានា ។ ការដោះស្រាយបញ្ហាមិនមែនគ្រប់ពេលជាការរក និង កែកំហុសឆ្គងនៅក្នុងកូដដែលសរសេរនោះទេ ព្រោះថានៅពេលដែលអ្នកសរសេរកម្មវិធី អ្នកត្រូវដោះស្រាយ

បញ្ហាដំណើរការរបស់កូដ ការរចនាគម្រោងអភិវឌ្ឍន៍កម្មវិធី ។ ការចេះដោះស្រាយបញ្ហាបានយ៉ាងប្រសើរ និង ឆាប់រហ័សជាកត្តាចម្បងក្នុងការកំណត់ពីសមត្ថភាពសរសេរកម្មវិធីរបស់អ្នក ។

អត្តាហិ អត្តនោ នាថោ (ខ្លួនទីពឹងខ្លួន)

អ្នកដែលទទួលបានលទ្ធផលសិក្សាទាប តែងតែមានការលំបាកនៅក្នុងការរៀនសរសរកម្មវិធី ហើយពួកគេក៏ជាអ្នកដែលជានិច្ចជាកាលតែងតែស្វែងរកជំនួយនានា ។ពួកគេពុំសូវគិតដល់ការខិតខំដោះស្រាយបញ្ហាដោយខ្លួនឯងទេ ។ វាពិតណាស់ថាការរកជំនួយជារឿងមិនអាចជៀសរួចសម្រាប់ការដោះស្រាយបញ្ហានៅពេលខ្លះ ប៉ុន្តែគួរតែរក្សាវានៅក្នុងកម្រិតមួយសមរម្យជៀសវាងការស្វែងរកជំនួយទាំងចំពោះរឿងតូចតាចធម្មតា ។ ត្រូវការនូវការមានគំនិតច្នៃប្រឌិត ចំពោះការដោះស្រាយបញ្ហាទាំងនោះ ។

ទទួលនូវមតិរិះគន់

វាពុំមែនជារឿងប្លែកទេនៅពេលអ្នកបានជួបអ្នកដែលគិតថាគេជាអ្នកដែលអស្ចារ្យជាងគេខាងសរសេរកម្មវិធីលើលោក ។ ហើយពួកគេនឹងធ្វើការវាយបកមកវិញភ្លាមៗនៅពេលមាននរណាម្នាក់ថាការសរសេរកូដរបស់ពួកគេមានបញ្ហា ។ បើសិនអ្នកបដិសេធន៍មិនទទួលនូវមតិរិះគន់ ស្ថាបនា ហើយមានចិត្តអស្មិមានៈ មិនទទួលយកនូវដំបូន្មានអ្នកដទៃដែលអាចជាដំបូន្មានដ៏ល្អ អ្នកនឹងតែងតែសរសេរកូដដដែលៗ ដោយមិនអាចស្វែងរកឃើញនូវវិធីសាស្ត្រសរសេរផ្សេងទៀតដែលល្អជាងបានឡើយ ។ អ្នករិះគន់អ្នកមិនមែនសុទ្ធតែត្រូវគ្រប់ពេលនោះទេ ប៉ុន្តែវាអាចនឹងមានតម្លៃក្នុងការស្ដាប់មតិយោបល់ពួកគេ ។ បើអ្នកច្បាស់លើសមត្ថភាពរបស់អ្នក នោះអ្នកនឹងមិនខ្លាចនូវមតិរិះគន់នានាឡើយ ព្រោះថាអ្នកអាចពន្យល់អ្នករិះគន់អ្នកវិញអំពីហេតុផលនៃការសរសេរកូដរបស់អ្នក ។

មានទំនាក់ទំនងល្អ និងមានសមត្ថភាពធ្វើការងារជាក្រុម

គម្រោងអភិវឌ្ឍន៍កម្មវិធីភាគច្រើននាពេលបច្ចុប្បន្នត្រូវការធ្វើការងារជាក្រុមនៃអ្នកសរសេរកម្មវិធី ។ មានតែគម្រោងតូចៗ និង ផ្ទាល់ខ្លួនប៉ុណ្ណោះដែលមិនត្រូវការទំនាក់ទំនងជាមួយអ្នកផ្សេងទៀត ។ ក្នុងន័យនេះអ្នកត្រូវមានសមត្ថភាពក្នុងការស្ដាប់ និងស្វែងយល់លើមិតិរបស់សមាជិកក្រុមផ្សេងទៀត ។ អ្នកក៏ត្រូវមានភាពប៉ិនប្រសប់ក្នុងការពន្យល់រាល់ការសម្រេចចិត្តនានារបស់អ្នកក្នុងការសរសេរកម្មវិធីនេះផងដែរ ។

ដុសខាត់ខ្លួនជាប្រចាំ (ត្រូវរៀនជាប្រចាំ មិនមែនងូតទឹកដុះក្អែល ខ្លួនជាប្រចាំ នោះទេ! ^_^ )

យើងដឹងហើយថាវិស័យអាយធី មានផ្លាស់ប្ដូរយ៉ាងឆាប់រហ័ស ។ ការរៀនរបស់យើងនៅថ្ងៃនេះអាចនឹងក្លាយជារបស់ដែលគេលែងប្រើយ៉ាងលឿន ។ បើអ្នកចង់បន្តក្លាយខ្លួនជាអ្នកសរសេរកម្មវិធីអ្នកត្រូវការបង្កើនសមត្ថភាពអ្នកជាប្រចាំ ។

មានន័យថាអ្នកត្រូវរៀនភាសា និង វិធីសាស្ត្រថ្មីៗ ។ អ្នកក៏ត្រូវការដុសខាត់នូវចំណេះដឹងរបស់អ្នកលើជំនាញចេះស្រាប់ច្បិចយកគំនិតល្អក្នុងការសរសេរកូដរបស់អ្នកសរសេរកម្មវិធីដទៃទៀត និងតាមដាននូវព្រឹត្តិការណ៍ ព័ត៌មានថ្មីៗ នានាពាក់ព័ន្ធនឹងកុំព្យូទ័រ ។

ស្រលាញ់ការសរសេរកូដ និង កុំព្យូទ័រ

មានអ្នកដែលក្លាយជាអ្នកសរសេរកម្មវិធីដោយពុំបានចាប់អារម្មណ៍លើជំនាញនេះ ។ គឺ ព្រោះតែពួកគេចង់បានប្រាក់ខែច្រើន ដូច្នេះពួកគេសម្រេចចិត្តរៀនទាំងចិត្តគេមិនស្រលាញ់ ពួកគេត្រូវបានបង្ខំឱ្យសរសេរកម្មវិធីឱ្យបានឆាប់រហ័សដោយការខ្វះខាតបុគ្គលិកនៅក្នុងក្រុមហ៊ុន ។ ទាំងនេះធ្វើឱ្យពួកគេក្លាយជាម៉ាស៊ីនសរសេរកម្មវិធី។ មនុស្សដែលធ្វើការងារបានល្អ គឺទាល់តែអ្នកនោះស្រលាញ់ និង ចាប់អារម្មណ៍យកចិត្តទុកដាក់លើការងារនោះទើបរីកចម្រើន បើអ្នកមិនចូល

ចិត្តអង្គុយនៅមុខកុំព្យូទ័រ និងធ្វើការងាររាប់ម៉ោងនោះប្រហែលជា ការសរសេរ កម្មវិធីមិនមែនជាជំនាញសម្រាប់អ្នកនោះទេ ។

តើធ្វើយ៉ាងណាដើម្បីក្លាយខ្លួនជាអ្នកសរសេរកម្មវិធីដ៏‹ល្អប្រសើរ›ម្នាក់?

ចូលរួមក្នុងសមាគមអ្នកសរសេរកម្មវិធី

មានសមាគមអ្នកសរសេរកម្មវិធីជាច្រើនដែលអ្នកអាចចូលរួមជាមួយតាមរយៈអ៊ីនធើណែត ។ ការចូលរួមគឺជាការពង្រឹងសមត្ថភាពរបស់អ្នក ។ ជាទូទៅសមាគមទាំងនេះតែងតែមាននូវព័ត៌មាន អត្ថបទ ឯកសារ ចុងក្រោយ និង វេទិកា សម្រាប់ឱ្យអ្នកស្វែងយល់រៀនសូត្រ និង ជួយអ្នកសរសេរកម្មវិធីឯទៀត ។

ធ្វើការជាមួយគម្រោងកូដបើកចំហ

វាជាគំនិតល្អនៅក្នុងការចូលរួមធ្វើការជាមួយគម្រោងកូដបើកចំហ ព្រោះអ្នកអាចរៀនសូត្រ តាមរយៈការសរសេរកម្មវិធីផង និង រៀនពីការសរសេរកូដរបស់អ្នកសរសេរកម្មវិធីផ្សេងទៀត ផង ។

បង្កើតគម្រោងផ្ទាល់ខ្លួន

ការបង្កើតគម្រោងផ្ទាល់ខ្លួនក៏ជាវិធីក្នុងការរៀនដ៏ប្រសើរផងដែរ ។ អ្នកត្រូវប្រាកដថាអ្នកបានធ្វើនូវអ្វីដែលថ្មី ប្លែកពីគម្រោងពីមុនដើម្បីទទួលបាននូវអត្ថប្រយោជន៍ពីការធ្វើនោះ ។ ការបង្កើតគម្រោងផ្ទាល់ខ្លួននេះអាចឱ្យអ្នកប្រើប្រាស់នូវតិចណូឡូជីថ្មីៗចុងក្រោយ និង រៀនសូត្រពីវា ។

អានឯកសារបង្រៀនសរសេរកម្មវិធី

នៅក្នុងអ៊ីនធើណែតមានព័ត៌មានជាច្រើនពាក់ព័ន្ធនឹងការសរសេរកម្មវិធីដែលជាធនធាន យ៉ាងសំខាន់ជាពិសេសសម្រាប់អ្នកសរសេរកម្មវិធីខ្មែរយើងដែលពុំសូវមានថវិកាដើម្បីទិញ សៀវភៅច្បាប់ដើមមកអាន ។

សរសេរកម្មវិធីក្នុងភាសា និងជំនាញដទៃទៀត

វាជាការល្អបើយើងចេះភាសាមួយច្បាស់លាស់ ប៉ុន្តែប្រជាប្រិយភាពរបស់ភាសាមួយហាក់ដូចជាផ្លាស់ប្ដូរយ៉ាងឆាប់រហ័ស អ្នកត្រូវត្រៀមខ្លួនក្នុងការរៀនភាសាថ្មី បើពុំដូច្នោះទេ អ្នកប្រហែលជាមិនអាចសរសេរកម្មវិធីបានច្រើនទេនៅថ្ងៃអនាគត ។ ម្យ៉ាងទៀតបើអ្នកបង្កើត កម្មវិធីកុំព្យូទ័រដែលពាក់ព័ន្ធតែនឹងគណនេយ្យ នោះអ្នកមានអារម្មណ៍ថាលំបាកក្នុងការបង្កើត កម្មវិធីដទៃទៀតដែលពាក់ព័ន្ធនឹងជំនាញដទៃ ។ អ្នកត្រូវរៀនបង្កើតកម្មវិធីផ្សេងៗដែលពាក់ព័ន្ធ នឹងជំនាញខុសៗគ្នា ដើម្បីទទួលបាននូវគំនិត និង វិធីសាស្ត្រថ្មីៗក្នុងការសរសេរកម្មវិធី ។

រៀនពីរឿងផ្សេងទៀតដែលមិនពាក់ព័ន្ធនឹងការសរសេរកម្មវិធី

រឿងដែលគួរឱ្យចាប់អារម្មណ៍អំពីការសរសេរកម្មវិធីគឺអ្នកមានឱកាសនឹងរៀនពីវិស័យ ជាច្រើនដែលមិនពាក់ព័ន្ធនឹងអាយធី ប៉ុន្តែទន្ទឹមនេះអ្នកត្រូវប្រឈមមុខនឹងការរៀនពីវិស័យ ថ្មីនៅរាល់ពេលដេលអ្នកធ្វើការជាមួយកម្មវិធីថ្មី ។ បើសិនអ្នកបានគិតទុកជាមុនអំពីការ ស្វែងយល់ទៅលើវស័យនានា នោះមានន័យថាអ្នកបានរៀបចំខ្លួនសម្រាប់សរសេរកម្មវិធីពាក់ព័ន្ ធនឹងវិស័យនានារួចជាស្រេច ហើយការរៀនពីវិស័យទាំងនោះ ក៏ជួយជាគំនិតដល់អ្នកក្នុងការដោះស្រាយបញ្ហាសរសេរកម្មវិធីផងដែរ ។

រំលឹកជាប្រចាំ

នៅពេលដែលអ្នកមិនបានធ្វើការជាមួយភាសា ឬ តិចណូឡូជីណាមួយក្នុងរយៈពេលយូរ អ្នកអាចនឹងភ្លេចពីវា ។ ដូច្នេះអ្នកត្រូវការអនុវត្តនូវរាល់ចំណេះទាក់ទងនឹងភាសា និង តិចណូឡូជីរបស់អ្នកដែលបានចេះចាំទាំងនោះឱ្យបានជាប់ជាប្រចាំ។

ប្រភពឯកសារដើម៖ បណ្តុំនៃឯកសារ

ទាញយកឯកសារ