ពានរង្វាន់ចំនួន៣៣ ត្រូវបានផ្តល់ជូនក្នុងកម្មវិធីអាណាចក្រតារាឆ្នាំ២០១៣

បញ្ចូលព័ត៌មានដោយ៖Unknown on Saturday, August 17, 2013 0

ពិធីករ ពិធីការិនី តារាសម្តែង តារាចម្រៀង ក្រុមកំប្លែង អ្នកផលិតកម្មវិធី និង វីរសិល្បករ ត្រូវបានកម្មវិធីអាណាចក្រតារាឆ្នាំ២០១៣ ប្រគល់ពានរង្វាន់ចំនួន៣៣ ក្នុងកម្មវិធីដ៏អស្ចារ្យមួយ ដែលប្រព្រឹត្តទៅនៅកោះពេជ្រ កាលពីល្ងាចថ្ងៃព្រហស្បត្តិ៍ ថ្ងៃទី១៥ខែសីហា។ ពិធីប្រគល់ពានរង្វាន់អាណាចក្រតារា ត្រូវបានបែងចែកជាច្រើនផ្នែក គឺលើវិស័យទូរទស្សន៍ និងកំសាន្ត។ ។ ពិធីករ ពិធីការិនី តារាសម្តែង និងតារាចម្រៀង ត្រូវបានជ្រើសរើស ដោយផ្អែកលើទេពកោសល្យ និងប្រជាប្រិយភាព គឺបោះឆ្នោតតាមទូរស័ព្ទដៃ ដើម្បីជ្រើសរើសតារាឆ្នើមជាងគេ។

ពានរង្វាន់ទីមួយ បានទៅលើពិធីការិនីដ៏ឆ្នើម បានទៅលើអ្នកនាង យុគ ចិន្ដា លោក ជា វិបុល ជាពិធីករទូទស្សន៍ប៉ុស្តិ៍លេខ៣។ ភាពយន្ដភាគទូរទស្សន៍ប្រចាំឆ្នាំ២០១៣ បានទៅលើ រឿង កែវភ្នែក និងរឿងពន្លកស្នេហ៍ក្បែរជាយដែន។ កម្មវិធីតន្ត្រីថ្ងៃអាទិត្យរបស់ទូរទស្សន៍ស៊ីធីអ៊ិន ក៏បានជាប់ពានរង្វាន់ជាកម្មវិធី មានប្រជាប្រិយភាពយូរជាងគេ។ ក្រុមកំប្លែងប្រចាំឆ្នាំ បានទៅលើក្រុមកំប្លែងនាយពែកមី។

ពិធីការិនីនៅទូរទស្សន៍បាយ័ន កញ្ញា ហ៊ិន ច័ន្ទនីរត្ន និងពិធីករទូរទស្សន៍MyTV លោក តាប៊ុយ នៅតែរក្សាមុខមាត់ក្នុងកម្មវិធីអាណាចក្រតារា២០១៣ ជាពិធីការិនី និងពិធីករ មានប្រជាប្រិយភាព។

អ្នកទទួលពានរង្វាន់ផ្សេងទៀត មាន លោក ម៉ៅ អាយុទ្ធ រដ្ឋលេខាក្រសួងព័ត៌មាន អ្នកគ្រូ អ៊ឹម ចំរើន ជាសិល្បការិនីនៅមន្ទីរសិល្បៈប្រចាំខេត្តកំពង់ស្ពឺឯកទេសល្ខោនយីកេ និងចម្រៀងប្រពៃណី លោក ទិត្យ ថាវរិទ្ធ ជាអគ្គនាយករងទូរទស្សន៍បាយ័ន អ្នកគ្រូ ប៉ន ស្រីម៉ៅ សិល្បការិនី នៅមន្ទីសិល្បៈប្រចាំខេត្តកំពង់ចាម លោក អ៊ុន សុធា ជាតារាប្រុសស្អាតប្រចាំស៊ីធីអ៊ិន លោក សួន ពិសិដ្ឋ ជាអ្នកនិពន្ធបទភ្លេងដ៏ឆ្នើមប្រចាំឆ្នាំ២០១៣ អ្នកស្រី ប៉ុល ពិសី ជាអ្នកនិពន្ធបទចម្រៀងឆ្នើមប្រចាំឆ្នាំ២០១៣ ក្រុមតន្ត្រីសម័យឆ្នើមប្រចាំឆ្នាំគឺ ក្រុមចចកសមុទ្រ និងក្រុម UTOPIA ជាក្រុមចម្រៀងសម័យឆ្នើមប្រចាំឆ្នាំ។

តារាចម្រៀងប្រជាប្រិយភាព បានទៅលើ លោកស្រី ហ៊ឹម ស៊ីវន កញ្ញា មាស សុខសោភា ជាតារាចម្រៀងសម័យស្រីសំឡេងពិរោះប្រចាំឆ្នាំ និងលោក ខេមរៈ សេរីមន្ដ ជាតារាចម្រៀងសម័យប្រុសសំឡេងពិរោះប្រចាំឆ្នាំ។ អ្នកដែលបានទទួលពានរង្វាន់កិត្តិយសអមតៈគឺមាន អ្នកស្រីឌី សាវ៉េត លោកស្រីច័ន្ទ ធី លោក ហ៊ូរ ឡាវី លោកគ្រូ ប្រាក់ ប៊ន អ្នកគ្រូ អ៊ាង ម៉ាឡៃ។

ពានរង្វាន់តួឯកស្រីឆ្នើមប្រចាំឆ្នាំ២០១៣គឺ កញ្ញា កែវ ពេជ្រពិសី ពានរង្វាន់តួឯកប្រុសឆ្នើមប្រចាំឆ្នាំ២០១៣គឺលោក ប៉ែន ចំរ៉ុង។ ពានរង្វាន់តួសំខាន់ឆ្នើមស្រីប្រចាំឆ្នាំ គឺអ្នកស្រី ស្វែង សុជាតា ឯតារាប្រុសគឺលោក ជា សំណាង។ ពានរង្វាន់អ្នកដឹកនាំរឿងឆ្នើមប្រចាំឆ្នាំគឺអ្នកស្រី ពាន់ ភួងបុប្ផា ហើយពានរង្វាន់ភាពយន្ដលេចធ្លោប្រចាំឆ្នាំគឺ រឿងកុមារី២៥ឆ្នាំ។

កម្មវិធីអាណាចក្រតារាឆ្នាំ២០១៣ មានពិធីករ និងតារាសម្តែងចំនួន១២៣រូប ដែលក្នុងនោះមានពិធីករ និងពិធីការិនីចំនួន៥០នាក់ ចូលរួមការប្រកួតប្រជែងដណ្តើមយកពានរង្វាន់។ កម្មវិធីនេះ មានការចូលរួមពីព្រឹទ្ធសិល្បករ សិល្បករ តារាចម្រៀង សម្តែង និងអ្នកមុខអ្នកការពាក់ព័ន្ធវិស័យសិល្បៈកម្សាន្ត និងបណ្ដាញផ្សព្វផ្សាយសរុបជាង១០០០នាក់។

កម្មវិធីអាណាចក្រតារាឆ្នាំ២០១៣ ដែលរៀបចំឡើងដោយក្រុមហ៊ុនសប្បាយ ធ្វើឡើងក្នុងគោលបំណង ដើម្បីលើកស្ទួយនិងរក្សាវិស័យសិល្បៈ វប្បធម៌ អរិយធម៌ ប្រពៃណី ទំនៀមទំលាប់ និងកេរដំណែលពីដូនតា។ អាណាចក្រតារា ជាកម្មវិធីមួយ ដែលបានចាប់ផ្ដើមធ្វើឡើងតាំងពីឆ្នាំ២០១២មក ហើយនេះជាលើកទីពីរដែលកម្មវិធីនេះបានធ្វើឡើងយ៉ាងអធិកអធមនៅឆ្នាំ២០១៣។

ប្រធានសមាគមសិល្បករខ្មែរ និងជាគណៈកម្មការក្នុងកម្មវិធីអាណាចក្រតារា លោក សុះ ម៉ាច មានប្រសាសន៍ថា ការប្រារព្ធកម្មវិធីប្រគល់ពានអាណាចក្រតារានេះ គឺដើម្បីលក់សំបុត្រ និងផ្ញើសារគាំទ្រតារាទាំងអស់នៅក្នុងកម្មវិធីប្រមូលថវិកាផ្តល់ជូន សមាគម យកទៅជួយសិល្បករ សិល្បការីនីខ្មែរដែល ចាស់ជរា ស្លាប់ បាត់បង់កាយសម្បទា ខ្វះខាត និងជួបបញ្ហាផ្សេងៗ។

លោក សុះ ម៉ាច ស្នើដល់សិល្បករ សិល្បការីនីខ្មែរទាំងអស់ក្នុងប្រទេសកម្ពុជាឲ្យចូលរួមកម្មវិធី ប្រគល់ពានអាណាចក្រតារាទាំងអស់គ្នាដើម្បីជួយលើកស្ទួយវិស័យ សិល្បៈកម្ពុជា ឲ្យរីកចម្រើនដូចបណ្តាប្រទេមួយចំនួននៅលើពិភពលោក៕